IND vs ZIM: जिम्बाब्वेविरुद्ध श्रेयस अय्यरची मोठी परीक्षा! जिम्बाब्वेला हलक्यात घेणं पडणार महागात

टीम इंडिया आणि इंग्लंडमध्ये (Team india vs England) नुकतीच वनडे मालिका खेळण्यात आली ज्यामध्ये टीम इंडियाला पराभव पत्करावा लागला.

त्यानंतर आता भारत आणि जिम्बाब्वे (IND vs ZIM) यांच्यात टी20 मालिकेची सुरुवात होत आहे. 3 सामन्यांच्या मालिकेतील पहिला सामना अवघ्या काही तासांनंतर म्हणजेच 23 जुलै रोजी खेळवला जाणार आहे. यासाठीची संघाची तयारी सुरू झाली आहे. या दरम्यान महत्वाची गोष्ट म्हणजे, टीम इंडियाला कोणत्याही परिस्थितीत जिम्बाब्वेला कमी लेखून जमणार नाही.

याआधी जरी टीम इंडियाने जिम्बाब्वेचा अनेकदा पराभव केला असला, तरी तीन वेळा असे घडले आहे, जेव्हा जिम्बाब्वेने भारतीय संघास पराभूत करण्यात यश मिळवले आहे. यापूर्वी शेवटचा पराभव शुबमन गिलच्या (Shubman gill) नेतृत्वाखालीच सहन करावा लागला होता.

भारत विरुद्ध जिम्बाब्वे मालिका ही टीम इंडियासाठी आणि विशेषतः कर्णधार श्रेयस अय्यरसाठी (Shreyas Iyer) कसोटीचा काळ आहे. भारत आणि जिम्बाब्वे यांच्यात आतापर्यंत टी20 आंतरराष्ट्रीय सामन्यांमध्ये एकूण 14 वेळा गाठ पडली आहे. यात तीन वेळा जिम्बाब्वेने बाजी मारली आहे, तर 11 वेळा टीम इंडियाने विजय मिळवला आहे. जिम्बाब्वेने टीम इंडियाचा पहिल्यांदा 2015 मध्ये पराभव केला होता. तेव्हा सामना हरारे येथे झाला होता आणि भारतीय संघाला 10 धावांनी पराभव पत्करावा लागला होता. यानंतर 2016 मध्ये पुन्हा जिम्बाब्वेने विजय नोंदवला. त्या सामन्यात अवघ्या 2 धावांचे अंतर होते.

2024 मध्ये जेव्हा टीम इंडियाने रोहित शर्माच्या नेतृत्वाखाली टी20 विश्वचषकाचे विजेतेपद पटकावले होते, त्यानंतर लगेचच जिम्बाब्वेचा दौरा झाला होता. त्या मालिकेसाठी शुबमन गिलला कर्णधार बनवण्यात आले होते. विश्वविजेता संघ पहिल्याच सामन्यात 13 धावांनी पराभूत झाला होता आणि टीम इंडियाच्या सलग विजयाचा सिलसिलाही खंडित झाला होता. मात्र, नंतर पुनरागमन करत टीम इंडियाने 4 सामने जिंकत मालिकेवर जोरदार कब्जा केला होता.

याआधी शेवटचा भारत आणि जिम्बाब्वे यांच्यात 2026 च्या टी20 विश्वचषकात सामना झाला होता, तेव्हा भारताने 72 धावांनी विजय मिळवला होता. आता 3 सामन्यांची मालिका आहे. यात श्रेयस अय्यरची कर्णधार म्हणून मोठी परीक्षा असेल. श्रेयसच्या नेतृत्वाखाली टीम इंडियाने आतापर्यंत सात टी20 सामने खेळले आहेत, पण अद्याप विजय मिळालेला नाही.

आयर्लंडसारख्या तुलनेने दुबळ्या मानल्या जाणाऱ्या संघाविरुद्धही श्रेयसचा संघ सपशेल पराभूत झाला होता. अशा स्थितीत जिम्बाब्वेला कमी लेखणे मोठी चूक ठरेल. जो संघ 3 वेळा जिंकला आहे, तो चौथ्यांदाही जिंकला तर यात नवल वाटण्यासारखे काही असणार नाही. तसेच, मालिकेचे सामने भारतीय वेळेनुसार साडेचार वाजता सुरू होणार आहेत. याचबरोबर टीम इंडिया श्रेयस अय्यरच्या नेतृत्वाखाली पहिली मालिका पहिला सामना जिंकण्यात यशस्वी ठरेल का हे पाहणेही तितकच महत्त्वाचे ठरणार आहे.