वडिलांनंतर आता मुलाचा बोलबाला! 16 षटकारांसह अवघ्या 28 चेंडूत शतक; अफगाण स्टारच्या मुलाची तुफानी खेळी

‘जसा बाप तसाच मुलगा’ (किंबहुना, वडिलांपेक्षाही एक पाऊल पुढे) ही म्हण अफगाणिस्तानचा दिग्गज अष्टपैलू खेळाडू मोहम्मद नबी याचा मुलगा हसन इसाखिल याला तंतोतंत लागू पडते. हसन हा देखील एक क्रिकेटपटू असून तो अफगाणिस्तानच्या वरिष्ठ संघात स्थान मिळवण्याच्या उंबरठ्यावर आहे. उझबेकिस्तानविरुद्ध अफगाण इलेव्हनकडून खेळताना अवघ्या 28 चेंडूत शतक झळकावून त्याने पुन्हा एकदा आपली क्षमता सिद्ध केली.

हसनने 34 चेंडूत 120 धावांची धडाकेबाज खेळी केली. या खेळीदरम्यान त्याने 16 षटकार आणि 4 चौकार लगावले. म्हणजेच त्याने जास्तीत जास्त धावा चौकार आणि षटकारांतून केल्या. त्याने 17 चेंडूत आपली पहिली पन्नास धावांची मजल गाठली आणि पुढील 50 धावा करण्यासाठी त्याला केवळ 11 चेंडू लागले.

हसनच्या या स्फोटक खेळीच्या जोरावर, अफगाण इलेव्हनने मर्यादित 20 षटकांत 7 बाद 323 धावांचा प्रचंड डोंगर उभारला. हसन यापूर्वी अफगाणिस्तानच्या कनिष्ठ संघाचा भाग राहिला आहे आणि त्याने बांगलादेश प्रीमियर लीगमध्ये आपले वडील मोहम्मद नबी यांच्यासोबत खेळण्याचा अनुभवही घेतला आहे.

323 धावांच्या या प्रचंड आव्हानाचा पाठलाग करताना उझबेकिस्तानचा संघ 20 षटकांत 7 बाद 124 धावाच करू शकला. परिणामी, अफगाण इलेव्हनने ही मैत्रीपूर्ण टी-20 लढत 199 धावांच्या मोठ्या फरकाने जिंकली.

खोस्त येथे झालेल्या या सामन्यात फलंदाजीतील उत्कृष्ट कामगिरीला साजेशी कामगिरी अफगाण इलेव्हनच्या गोलंदाजांनीही केली. नसीर खान मारूफखिलने 15 धावांत 2 बळी घेतले. इम्रान मीरने 22 धावांत 2 बळी टिपले, तर वफादार मोमंदने 28 धावांत दोन फलंदाजांना बाद केले. सर्वच फाॅरमॅटमध्ये वर्चस्व गाजवत अफगाण इलेव्हनने दणदणीत विजय मिळवला.