डॉक्टर वडिलांच्या मृत्यूनंतर चक्क बहीण भावाने थाटला बोगस दवाखाना, कुणकुण लागताच बिंग फुटलं!

नागपूर क्राइम न्यूज: नागपूर शहरातून बोगस दवाखान्यासंदर्भात मोठी बातमी समोर आली आहे. यात डॉक्टर वडिलांच्या मृत्यूनंतर चक्क बहीण भावाने चक्क बोगस दवाखाना (Bogus Doctor) थाटल्याचे प्रकरण उजेडात आले आहे. नागपूर शहरतील अन्सारनगर मधील हे प्रकरण असून या प्रकाराचा भंडाफोड होताच सर्वत्र एक खळबळ उडाली आहे. पुढे आलेल्या माहितीनुसार डॉक्टर असलेल्या वडिलांच्या मृत्यूनंतर कुठल्याही प्रकारचे वैद्यकीय शिक्षण नसताना भाऊ-बहीण दवाखाना चालवत होते. दरम्यान, महानगरपालिकेच्या वैद्यकीय अधिकाऱ्यांच्या तक्रारीनंतर तहसील पोलीस आणि मनपाने संयुक्त कारवाई करत या प्रकरणाचा भांडाफोड केला आहे.

कुणकुण लागताच बिंग फुटलं; बहीण भावाविरोधात नागपुरात गुन्हा दाखल

मिळालेल्या माहितीनुसार, नागपूर शहरतील अन्सारनगर परिसरात डॉक्टर साजिद अन्सारी हे क्लिनिक चालवायचे. मात्र त्यांचा दीड वर्षापूर्वी मृत्यू झाला. त्यामुळे साजिद अन्सारी यांच्या मृत्यूनंतर 23 वर्षीय मुलगा जैद अन्सारी आणि बहीण समन अन्सारी हे क्लिनिक चालवत होते. मात्र हा दवाखाना चालवत असताना त्यांनी कुठलेही वैद्यकीय शिक्षण न घेता या क्लिनिकमध्ये ते दोन शिफ्ट मध्ये रुग्णावर उपचार करत होते. या अवैध क्लिनिकमध्ये बीपी मशीनसह वैद्यकीय साहित्य ही ठेवले होते. सोबतच इंजेक्शन, औषधे, सलाईन देखील आढळून आली आहे. या घटनेची माहिती मिळाताच महानगरपालिकेच्या वैद्यकीय अधिकाऱ्यांच्या तक्रारीनंतर तहसील पोलीस आणि मनपाने संयुक्त कारवाई करत या प्रकरणाचा भांडाफोड केला आहे.  मनपा वैद्यकीय अधिकाऱ्यांच्या तक्रारीवरून पोलिसांनी दोन्ही आरोपी विरोधात महाराष्ट्र वैद्यकीय परिषद अधिनियम अंतर्गत गुन्हा दाखल केला असून पुढील कारवाई सुरू करण्यात आली आहे. मात्र या प्रकरणाने सर्वत्र एकच खळबळ उडाली असून सर्वसामान्यांच्या जीवाशी खेळ खेळण्याच्या कृत्याने वैद्यकीय क्षेत्रातूनही संतप्त प्रतिक्रिया उमटत आहे.

जैन मंदिरातुन प्राचीन मूर्तीची चोरी,घटना सीसीटीव्ही कॅमेऱ्यात कैद

दरम्यान, नागपुरातील जैन मंदिरातुन प्राचीन मूर्तीची चोरी झाली असल्याचे प्रकरण उजेडात आले आहे. शहरतील कोतवाली पोलीस स्टेशन हद्दीतील श्री शीतल नाथ दिगंबर जैन मंदिरात ही चोरीची घटना घडली आहे. मध्यरात्री 2 वाजेच्या सुमारास ही चोरीची घटना घडली असून ही घटना सीसीटीव्ही कॅमेऱ्यात कैद झालीय. घटनेची माहिती मिळताच कोतवाली पोलिसांकडून सीसीटीव्ही फुटेजच्या माध्यमातून चोराचा शोध सुरू करण्यात आला आहे. मात्र या चोरीच्या घटनेने परिसरात एकच खळबळ उडाली आहे.

इतर महत्वाच्या बातम्या

अधिक पाहा..