आधी IPS अंजली कृष्णांच्या चौकशीची मागणी, आता अमोल मिटकरींचा यू-टर्न; दिलगिरी व्यक्त करत म्हणाले

सोलापूर: राज्याचे उपमुख्यमंत्री अजित पवार (Ajit Pawar) यांनी एका महिला पोलीस अधिकाऱ्यावर फोनवरुन दमदाटी केल्याचा व्हिडीओ व्हायरल झाला, त्यानंतर राज्यभरात हे प्रकरण चर्चेत आले आहे. महिला पोलीस उपअधीक्षक अंजना कृष्णा (IPS Anjana Krishna) आणि अजित पवारांच्या व्हिडीओ कॉलची क्लीप व्हायरल झाल्यानंतर, महिला अधिकाऱ्यांची केंद्रीय लोकसेवा आयोगातील नेमणुकीची चौकशी करा, अशी मोठी मागणी राष्ट्रवादीचे आमदार अमोल मिटकरी यांनी केली होती, त्याबाबत त्यांनी पत्र देखील लिहलं होतं, त्यानंतर आता पुन्हा अमोल मिटकरी यांनी याबाबत सोशल मिडीयावर पोस्ट करत दिलगिरी व्यक्त केली आहे, त्याचबरोबर ही आपली भूमिका होती, पक्षाची नाही, मी पक्षाच्या भूमिकेशी सहमत आहे असंही मिटकरींनी म्हटलं आहे.

दिलगिरी व्यक्त करत घेतला यूटर्न

सोशल मिडीयावरची अमोल मिटकरींनी पोस्ट शेअर करत दिलगिरी व्यक्त केली आहे, आणि म्हटलंय की,”सोलापुर घटनेसंदर्भात केलेला ट्वीट मी बिनशर्थ मागे घेऊन दिलगिरी व्यक्त करतो.ही माझ्या पक्षाची भुमिका नव्हती तर माझी वैक्तिक भुमिका होती .आपले पोलिस दल व प्रामाणिकपणे सेवा करणाऱ्या अधिकाऱ्यांबद्दल मला सर्वोच्च आदर आहे. मी पक्षाच्या वरिष्ठ नेतृत्वाच्या भुमिकेशी पूर्णपणे सहमत आहे”, असंही त्यांनी पुढे म्हटलं आहे.

सोलापुर घटने संदर्भात केलेला ट्वीट मी बिनशर्थ मागे घेऊन दिलगिरी व्यक्त करतो.ही माझ्या पक्षाची भुमिका नव्हती तर माझी वैक्तिक भुमिका होती .आपले पोलिस दल व प्रामाणिकपणे सेवा करणाऱ्या अधिकाऱ्यांबद्दल मला सर्वोच्च आदर आहे. मी पक्षाच्या वरिष्ठ नेतृत्वाच्या भुमिकेशी पूर्णपणे सहमत आहे.

— आ. अमोल गोदावरी रामकृष्ण मिटकरी (@amolmitkari22) 6 सप्टेंबर, 2025

मिटकरी यांनी शुक्रवारी केंद्रीय लोकसेवा आयोगाला (यूपीएससी) पत्र लिहून कृष्णा यांनी सादर केलेल्या कागदपत्रांची चौकशी करण्याची मागणी केली. एका पत्रात त्यांनी कृष्णा यांची शैक्षणिक पात्रता, जात प्रमाणपत्र आणि इतर कागदपत्रांची पडताळणी करण्याची मागणी केली. त्यांनी विनंती केली की हे निष्कर्ष संबंधित सरकारी विभागांना कळवावेत. अधिकृत नोंदींची योग्य छाननी करण्यासाठी चौकशी आवश्यक आहे, असंही त्यांनी म्हटलं होतं.

पूजा खेडकर प्रकरणाप्रमाणेच अंजना कृष्णा यांच्या निवड प्रक्रियेत घोळ

राज्याच्या उपमुख्यमंत्र्यांचे नाव माहीत नसलेल्या महिला अधिकाऱ्याची नियुक्ती संशयास्पद आहे. पूजा खेडकर प्रकरणाप्रमाणेच अंजना कृष्णा यांच्या निवड प्रक्रियेत घोळ झाला असल्याची आपल्याला शंका असल्याचं आमदार अमोल मिटकरी यांनी म्हटलं होतं. अंजना कृष्णा यांच्या नेमणुकी संदर्भात राज्य सरकार आणि केंद्रीय लोकसेवा आयोगाकडे तक्रार करणार असल्याची आमदार अमोल मिटकरी यांनी माहिती दिली होती. त्यानंतर त्यांनी त्यासंदर्भात पत्र देखील लिहलं होतं.

नेमकं प्रकरण काय?

माढ्याच्या कुर्डू गावात रस्त्यासाठी मुरुम उत्खनन होत असल्याची तक्रार आल्यानुसार करमाळ्याच्या पोलिस उपअधिक्षक अंजना कृष्णा या घटनास्थळी पोहचल्या. मुरुम उचलण्याच्या मुद्यावरुन कुर्डू गावातील नागरीक आणि अंजली कृष्णा यांच्यामध्ये शाब्दिक जुगलबंदी रंगली. यादरम्यान राष्ट्रवादी काँग्रेसच्या बाबा जगताप या कार्यकर्त्याने थेट उपमुख्यमंत्री अजित पवारांना फोन लावून अंजली कृष्णा यांच्या हातात दिला. मात्र त्यांना अजित पवार आणि त्यांचा आवाज ओळखता आला नाही. तिकडून अजित पवार दोनदा सांगताना दिसले की डीसीएम अजित पवार बोल रहा हूं. ये कार्यवाही बंद करो…मेरा आदेश हैं.. त्यावर कृष्णा म्हणतात मेरे फौन पर काॅल करें..त्यावर पवार म्हणताहेत..की तुम पे अॅक्शन लूंगा.. इतनी डेरिंग है तुम्हारी..मेरा चेहरा तो पेहचानोगा ना..असे रागावून अजित पवार बोलले आणि अजित पवारांनी व्हिडीओ काॅल केला. त्यावर कृष्णा बांधावरच जाऊन बसून पवारांशी बोलताना दिसल्या…यात अजित पवार कार्यवाही थांबवण्याचे आदेश देत असल्याचे पहायला मिळत असून…माझा फोन आलाय…तहसीलदारांना सांगा असे पवार सांगताना दिसतात.

करमाळ्याच्या पोलिस उपअधिक्षक अंजली कृष्णा यांना उपमुख्यमंत्री अजित पवारांना फोनवरुन ओळखता आले नाही.
त्यानंतर रागावलेल्या अजित पवारांनी अंजली कृष्णा यांना खडेबोल सुनावत थेट व्हिडीओ काॅलच केला.#Ajitpawar #अंजालिकृष्ण pic.twitter.com/ag2dnuf3do

– अंकीता शांतीनाथ खाने (@khaneankita) 2 सप्टेंबर, 2025

कोण आहेत आयपीएस अंजना कृष्णा? (Who is IPS Anjana Krishna?)

1. आयपीएस अंजना कृष्णा मूळच्या केरळच्या त्रिवेंद्रममधल्या
2. 2023 मध्ये यूपीएससी 355 रँकने उत्तीर्ण, आयपीएस केडर
3. सुरुवातीला होम केडर, त्रिवेंद्रममध्ये एसीपीची जबाबदारी
4. मग महाराष्ट्रC. सोलापूर ग्रामीण पोलिसात कार्यरत
5. प्रोबेशन कालावधीत पंढरपूरमध्ये उपविभागीय पोलीस अधिकारी
6. अतिशय कडक शिस्तीच्या अधिकारी अशी ओळख निर्माण
7. करमाळ्यात अवैध व्यवसायाविरोधात कारवाईचा धडाका
8. दोन दिवसांपूर्वी अवैध मुरूम उपसा सुरू असताना माढा तालुक्यातील कुर्डू येथे कारवाई
9. याच कारवाईसंदर्भात अजित पवारांशी बोलताना ठाम भूमिका

आणखी वाचा