पूजा खेडकरच्या वडिलांना मोठा दिलासा; ट्रक क्लिनरच्या अपहरण प्रकरणात हायकोर्टाकडून अटकपूर्व जामी

दिलीप खेडकर: नवी मुंबईत ट्रक क्लिनरच्या अपहरण प्रकरणात फरार असलेले निवृत्त आयएएस अधिकारी दिलीप खेडकर (Dilip Khedkar) यांना अखेर मुंबई उच्च न्यायालयाकडून (Bombay High Court) अटकपूर्व जामीन मंजूर करण्यात आला आहे. रस्ते अपघातानंतर झालेल्या या वादग्रस्त घटनेत खेडकर आणि त्यांच्या अंगरक्षकावर ट्रक क्लिनरला मारहाण करून जबरदस्तीने गाडीत बसवून नेल्याचा गंभीर आरोप आहे.

Dilip Khedkar: काय आहे प्रकरण?

12 सप्टेंबर रोजी नवी मुंबईतील मुलुंड-आयरोली लिंक रोडवर 22 वर्षीय प्रल्हाद कुमार या ट्रक क्लिनरच्या काँक्रीट मिक्सर ट्रकने चुकून दिलीप खेडकर यांच्या लँड क्रूझर गाडीला धक्का दिला. या घटनेनंतर, संतापाच्या भरात दिलीप खेडकर आणि त्यांच्या अंगरक्षकाने प्रल्हाद कुमारला मारहाण करत गाडीत बसवले आणि “पोलिस ठाण्यात नेतो” असे सांगत त्याचे अपहरण केल्याचा आरोप नोंदवण्यात आला. 14 सप्टेंबरला, पोलिसांनी खेडकर यांच्या घरातून प्रल्हाद कुमारला सुरक्षित सोडवले, तेव्हापासून खेडकर फरार होते. त्यांचा 6 ऑक्टोबरला अटकपूर्व जामीन फेटाळला गेला होता, मात्र 16 ऑक्टोबर रोजी उच्च न्यायालयाने जामीन मंजूर केला.

दिलीप खेडकर: बायको मनोरमा खेडकर यांच्यावरही गंभीर आरोप

दिलीप खेडकर यांची पत्नी मनोरमा खेडकर यांच्यावरही पोलीस तपासात अडथळा निर्माण केल्याचा आरोप आहे. पोलिसांनी दिलेल्या माहितीनुसार, त्यांनी चौकशीसाठी नोटीस बजावूनही सहकार्य केले नाही. सायंकाळी 6 वाजल्यानंतर चौकशीसाठी हजर झाल्या, ज्यामुळे कायद्याचे उल्लंघन केल्याचा आरोप पोलिसांनी न्यायालयात केला. याच प्रकरणात मनोरमा खेडकर यांना देखील 15 दिवसांपूर्वी स्थानिक न्यायालयाकडून अटकपूर्व जामीन मंजूर करण्यात आला होता. मात्र, याबाबतची माहिती पोलिसांकडे नव्हती, अशी कबुलीही पोलिसांनी दिली आहे.

Dilip Khedkar: पूजा खेडकर कुटुंब पुन्हा एकदा चर्चेत

दरम्यान, मनोरमा खेडकर यांचा वादग्रस्त इतिहासही लक्षवेधी ठरतो. पुण्यातील चतु:श्रृंगी पोलीस ठाण्यात त्यांच्या विरोधात बनावट कागदपत्रांच्या आधारे मालमत्तेवर कब्जा मिळवण्याचे गुन्हे दाखल आहेत. तसेच, अनेक वेळा त्यांनी शासकीय अधिकाऱ्यांशी उर्मट वर्तन केल्याच्या तक्रारीही नोंदवल्या गेल्या आहेत. परिसरात त्यांच्या वर्तनामुळे दहशत निर्माण झाल्याचे आरोप शेजाऱ्यांनी केले होते. या साऱ्या घटनांमुळे वादग्रस्त आयएएस अधिकारी पूजा खेडकर आणि त्यांचे कुटुंब पुन्हा चर्चेत आले आहेत. पूजा खेडकर यांच्यावर आधीच नियमभंग, निलंबन व नियुक्ती प्रक्रियेत फसवणुकीचे आरोप आहेत. आता त्यांच्या पालकांवरही गंभीर गुन्हे दाखल होत असल्याने, खेडकर कुटुंब पुन्हा एकदा चर्चेच्या केंद्रस्थानी आहे.

आणखी वाचा

Pune Crime Pooja Khedkar Family : पूजा खेडकरच्या बंगल्यात दोन तास झाडाझडती, पोलिसांच्या हाती काय लागलं? समोर आली मोठी अपडेट

आणखी वाचा