बायको हरवल्याची तक्रार अन् पोलिस तीन महिने शोधत राहिले, दरीत मृतदेह सापडल्यानंतर पोलिस चक्रावले

पुणे: पुणे जिल्ह्यातील इंदापूर तालुक्यात बायकोवरती चारित्र्याचा संशय घेत पतीने तिचा गळा आवळत तिची हत्या केल्याची संतापजनक घटना समोर आली आहे. नराधम पतीने पहिल्यांदा पत्नीला संपवलं आणि नंतर पत्नीचा मृतदेह नाशिक जिल्ह्यातील नांदगाव येथील घाटात सुमारे दीडशे फुट खोल दरीमध्ये फेकला. त्यानंतर बायको हरवल्याची तक्रार पोलिस ठाण्यात दिली. मात्र, तब्बल तीन महिन्यानंतर पोलिसांनी या मृत्यूचं गूढ उकललं आहे.

नेमकं काय घडलं?

बायकोवरती चारित्र्यावर संशय घेत पतीने तिचा गळा आवळत तिची हत्या केली, त्यानंतर तिचा मृतदेह इंदापुरपासून जवळपास तीनशे किलोमीटर अंतरावर असणाऱ्या नाशिक जिल्ह्यातील नांदगाव येथील घाटात सुमारे दीडशे फुट खोल फेकत बायको हरवल्याची तक्रार या नराधम पतीने इंदापूर पोलिसांत दिली. मात्र, तब्बल तीन महिन्यानंतर पोलिसांनी या मृत्यूचं गूढ उकललं आहे. इंदापूर तालुक्यातील चितळकरवाडी येथील प्रियंका शिवाजी चितळकर हिचा 2013 साली इंदापूर तालुक्यातील कळाशी येथील ज्योतीराम करे याच्याशी विवाह झाला होता.

बायको हरवण्याची तक्रार दाखल केली

त्यानंतर त्यांना दोन मुलं देखील झाली होती. दरम्यान मागील काही महिन्यांपासून ज्योतीराम करे याचा पत्नी प्रियंकाच्या चारित्र्यावर संशय होता. यातून दोघांमध्ये वारंवार वाद होत होते. त्यानंतर 29 जानेवारी 2025 रोजी ज्योतीराम करे यानं इंदापूर पोलिसात आपली बायको हरवण्याची तक्रार दाखल केली होती. प्रियंका करे हरवल्याची तक्रार दाखल झाल्यानंतर इंदापूर पोलिसांनी तपास सुरू केला. मात्र, ही महिला हरवली नाही तर तिचा खून झाला असावा असा संशय इंदापूर पोलिसांना वाढला आणि पोलिसांनी त्या दृष्टीने आपला तपास सुरू केला.

दीडशे फूट खोल दरीत फेकलेला कुजलेल्या

ज्योतीराम करे हा सातत्याने पोलिसांना खोटी माहिती देण्याचा प्रयत्न करत होता. शेवटी पोलीस त्याला घेऊन नाशिकच्या नांदगाव परिसरातील डोंगर घाटात पोहचले आणि तब्बल दीडशे फूट खोल दरीत फेकलेला कुजलेल्या अवस्थेतील प्रियंका सांगाडा पोलिसांनी बाहेर काढला. ज्योतीराम करे हा साखर कारखान्याला ऊस पुरवठा कामी ट्रॅक्टर चालवतो. त्यामुळे त्याला या परिसराची चांगली माहिती होती. आपल्या आणखी एका मित्राच्या सहाय्याने त्याने नांदगावच्या डोंगरदरीत प्रियंकाचा मृतदेह फेकला. प्रियंकाचा शोध लावणं हे इंदापूर पोलिसांसमोर एक आव्हान होतं, मात्र, तीन महिन्यानंतर पोलिसांनी प्रियंका हरवली नाही. तर तिची हत्या झालीय याचा तपास लावला आणि थेट प्रियंकाचा सांगाडाच पोलिसांच्या हाती लागला. याप्रकरणी इंदापूर पोलिसांनी ज्योतीराम करे आणि दत्तात्रय गोलांडे या दोघांना बेड्या ठोकल्या आहेत.

अधिक पाहा..