मी कोणत्या पार्टीत यावर मुंबईत चर्चा होईल, त्यांना एकच सांगेन… : रामराजे नाईक निंबाळकर

सातारा (फलटण) : फलटण नगरपालिका निवडणुकीच्या प्रचारासाठी एकनाथ शिंदे यांच्या उपस्थितीत प्रचार सभा सुरु आहे. रामराजे नाईक निंबाळकर यांचे चिरंजीव अनिकेतराजे नाईक निंबाळकर हे शिवसेनेच्या चिन्हावर फलटण नगराध्यक्षपदासाठी निवडणुकीच्या रिंगणात आहेत. या सभेत विधानपरिषदेचे माजी सभापती आणि आमदार रामराजे नाईक निंबाळकर यांनी विविध मुद्यांवर भाष्य केलं. रामराजे नाईक निंबाळकर पुढं म्हणाले, सातारा जिल्ह्यापुरतं एकच सांगेल जिल्ह्याची संस्कृती नष्ट केली. ती संस्कृती आपल्याला परत आणायची आहे. यासाठी हे नेतृत्व आपल्याला पुन्हा पाठबळ देईल, अशी आशा रामराजे नाईक निंबाळकर यांनी व्यक्त केली.

सातारा जिल्हा, फलटण तालुका इथले कार्यकर्ते मुलासारखं सांभाळले आहेत. माझ्या कुटुंबातील लोकांनी निर्णय घेतला आहे तुमच्यासोबत जायचंच. माझ्या कोणत्याही अपेक्षा नाहीत. माझ्या तत्कालीन नेत्यांनी भरभरुन जे दिलं होतं त्याचा फायदा संपूर्ण जिल्ह्याला झाला. आमची कुटुंब व्यवस्थित ठेवा, मुलं बाळ व्यवस्थित ठेवा, पोलीस चौकीचं राजकारण झालं तर जी ताकद लागते ती द्या याच्यापलीकडे आम्हाला काय मागायचं नाही, असं रामराजे नाईक निंबाळकर यांनी म्हटलं.

एकनाथ शिंदे पहिल्यांदा मंत्री झाले तेव्हा मी सभापती होतो. मुंबईला निघालो होतो, घाटात काही तरी ढासळलं होतं, समोर पाहिलं तर स्वत: मंत्री कामाच्या तिथं उभा होता. असा मंत्री माझ्या आयुष्यात पाहिला नाही.  काम चालू असताना स्वतः मंत्री तिथे काम करून घेतो असं समर्पण त्यांचं आहे, असं रामराजे नाईक निंबाळकर म्हणाले. इतकं सगळं चालू असताना आपण चेहरा शांत आणि निर्विकार कसा ठेवता हे मला जरा शिकवा, असंही रामराजे नाईक निंबाळकर यांनी म्हटलं.

मी कुठल्या पार्टीत यावर मुंबईत चर्चा होईल : रामराजे नाईक निंबाळकर

आपण फलटणमध्ये आलात सगळे  प्रोटोकॉल बाजूला ठेवून आलोय. मी कुठल्या पार्टीत आहे, यावर मुंबईवर चर्चा होणार फक्त मी एकच सांगेन मी महायुतीत आहे. बाकीचं काय बोलून मला वेळ घालवायचं नाही, असं रामराजे नाईक निंबाळकर यांनी म्हटलं.

जिल्ह्यात काय करायचे ते करु, कुठल्याही पार्टीत माझे शत्रू नाहीत. मला न पटणारी लोक या जिल्ह्यात आहेत. मी चार-पाच मुख्यमंत्र्यांसोबत काम केला आहे पण असा मुख्यमंत्री (एकनाथ शिंदे) मी बघितला नाही, असं रामराजे नाईक निंबाळकर यांनी म्हटलं.

माझी लेकरं समोर बसले आहेत त्यांचं संरक्षण करून त्यांचा आशीर्वाद तुम्हाला मिळावेत. कृष्णा खोरे याचं जे यश आहे, ते बाळासाहेब ठाकरे आणि मनोहर जोशी यांच्यामुळं आहे, ते नंतर सांगेन, असं रामराजे नाईक निंबाळकर यांनी म्हटलं. आम्हाला थोडासा वेळ द्या आमची लोक तुम्हाला आपलीशी करतील, थोडा मोकळा वेळ देऊन आपण बोलावं, असं रामराजे नाईक निंबाळकर यांनी म्हटलं.

आणखी वाचा