IPL दरम्यान CSK ची गुपितं लीक करून 3 कोटी रुपये कमावले; माजी खेळाडूचा धक्कादायक गौप्यस्फोट, स्टिंग ऑपरेशनमध्ये पर्दाफाश

इंडियन प्रीमियर लीग (आयपीएल) आणि दिल्ली प्रीमियर लीगमध्ये (डीपीएल) मॅच फिक्सिंग करून कोट्यवधी रुपये कमावल्याचा खळबळजनक खुलासा माजी रणजी खेळाडूने केला आहे. पाच वेळच्या विजेत्या चेन्नई सुपर किंग्सची गुपिते लंडन येथील बुकिंना पुरवण्यासाठी आपल्याला प्रचंड रक्कम मिळाल्याचे माजी क्रिकेटपटूने म्हटले आहे. ‘तहलका’ या मासिकाने केलेल्या स्टिंग ऑपरेशनमध्ये दिल्ली आणि नागालँडकडून खेळलेला माजी रणजी खेळाडू रचित भाटिया याने आयपीएल आणि डीपीएल दरम्यान गोपनिय माहिती बुकिंना पुरवल्याचे समोर आले आहे. यामुळे क्रीडा विश्वात एकच खळबळ उडाली आहे.

डिसेंबर 2025 ते ऑगस्ट 2026 या कालावधीमध्ये हे गुप्त स्टिंग ऑपरेशन पार पडले. या दरम्यान रिपोर्टरने बुकी बनून रचित भाटिया याच्यासोबत अनेकदा संवादही साधला. यावेळी रचित भाटिया याने आयपीएल 2025 दरम्यान सामना सुरू होण्यापूर्वी चेन्नई सुपर किंग्जची प्लेइंग 11 ची माहिती लंडन येथील बुकिंना पुरवली. यासाठी त्याने स्नॅपचॅट ॲपचा वापर केला.

एका सामन्याची माहिती पुरवण्यासाठी त्याला तब्बल 60 लाख रुपये मिळाले. अशा एकूण 5 सामन्यांची माहिती दिल्याबद्दल आपल्याला 3 कोटी रुपये मिळाल्याचे रचित भाटिया याने सांगितले. तसेच आपल्याला ही माहिती सीएसकेच्या ताफ्यातील एका खेळाडूकडूनच मिळत असल्याचे भाटिया याने सांगितले. मात्र चेन्नईचा कोणता खेळाडू त्याला ही माहिती पुरवत होता त्याचे नाव समोर आलेले नाही. याबाबत बीसीसीआय किंवा पोलिसांनीही अधिकृत माहिती दिलेली नाही.