प्रांजल खेवलकरवरील रोहिणी खडसे: हनीट्रॅपच्या आरोपावर एकनाथ खडसे आणि गिरीश महाजनांमध्ये वादंग सुरू असताना आता पुण्यातील एका पार्टीवरून दुसरं वादळ निर्माण झालं. पुण्यातील एका पार्टीवर (Pune Rave Party) काल (27 जुलै) पोलिसांनी धाड टाकली. या कारवाईत एकनाथ खडसे (Eknath Khadse) यांचा जावई आणि रोहिणी खडसे यांचे पती प्रांजल खेवलकर (Pranjal Khewalkar) यांना अटक करण्यात आली. उच्चभ्रूची वस्ती असलेल्या पुण्यातील खराडीत एका हॉटेलमध्ये ही पार्टी सुरू होती. पण त्यात खडसेंच्या जावयाचं नाव समोर आल्यानं मोठं राजकारण रंगलं आहे. याचदरम्यान आता रोहिणी खडसे यांनी सदर प्रकरणावर पहिल्यांदाच प्रतिक्रिया दिली आहे.
पती प्रांजल खेवलकर (Pranjal Khewalkar) यांना अटक केल्यानंतर रोहिणी खडसे यांनी एक्सवर पोस्ट करत पहिली प्रतिक्रिया दिली आहे. कायद्यावर व पोलीस यंत्रणेवर माझा पूर्ण विश्वास आहे. प्रत्येक गोष्टीला वेळ हेच उत्तर असतं. योग्य वेळी सत्य बाहेर येईल, असं रोहिणी खडसे यांनी म्हटलं आहे. दरम्यान, या प्रकरणातील आरोपी प्रांजल खेवलकरसह सातही आरोपींना न्यायालयाने दोन दिवसांची पोलिस कोठडी सुनावली आहे.
कायद्यावर व पोलीस यंत्रणेवर माझा पूर्ण विश्वास आहे. प्रत्येक गोष्टीला वेळ हेच उत्तर असतं. योग्य वेळी सत्य बाहेर येईल !
विजय महाराष्ट्र! pic.twitter.com/hbxpkraenm
— Adv Rohini Eknathrao Khadse (@Rohini_khadse) 28 जुलै, 2025
25 जुलैला देखील पार्टी, पोलिसांचा दावा-
पुणे पोलिसांनी छापा टाकून एकानाथ खडसे यांचे जावई प्रांजल खेवलकर यांच्यासह सात जणांना पार्टी करताना 27 जुलै रोजी पहाटे अटक केली.या पार्टीत अमंली पदार्थ सापडल्याचा पुणे पोलीसांचा आरोप आहे. 26 जुलै रात्री पुण्यातील खराडी भागातील एका फ्लॅटवर ही पार्टी सुरु झाली होती. मात्र पोलीसांच्या मते अशीच पार्टी 25 जुलैला देखील झाली होती असा पोलिसांचा दावा आहे. प्रांजल खेवलकर यांनी चार दिवसांसाठी तो फ्लॅट बुक केला होता. त्यामुळे पुणे पोलीस शुक्रवारी 25 जुलैला झालेल्या पार्टीची देखील चौकशी करणार आहेत. त्यासाठी ज्या फ्लॅटमधे पार्टी झाली तिथले सी सी टी व्ही फुटेज देखील तपासणार आहेत.
एकनाथ खडसे काय म्हणाले?
एकनाथ खडसे यांनी देखील भाष्य केले आहे. गेल्या काही दिवसात जे वातावरण सुरू आहे, त्यानुसार असं काही घडू शकते याचा अंदाज मला येत होता. पुण्यात घटना घडली असे सांगितले जात आहे. मी हे मीडियातूनच पाहिले आहे. माझं अजून प्रत्यक्षात त्यांच्याशी बोलणं झालेलं नाही. कारण ते पोलिसांच्या ताब्यात आहेत. जर ती खरी रेव्ह पार्टी असेल आणि त्या रेव्ह पार्टीत आमचे जावई गुन्हेगार असतील तर मी त्याचं समर्थन करणार नाही. पण पोलीस यंत्रणेने प्रामाणिकपणे तपास करावा, अशी आमची अपेक्षा आहे. जावई असो किंवा अन्य कुणी असो जर दोषी असेल तर शासन झाले पाहिजे. पण कुणाला अडकवण्याचा प्रयत्न करणार असाल तर ते सहन केले जाणार नाही. त्याचा निश्चितपणे आम्ही विरोध करू, असे एकनाथ खडसे यांनी म्हटले आहे.
संबंधित बातमी:
आणखी वाचा
Comments are closed.