CSK vs GT: ऋतुराज गायकवाडची दिग्गज धोनी आणि रैनाच्या क्लबमध्ये एन्ट्री! ठरला हा पराक्रम करणारा चेन्नईचा केवळ चौथा खेळाडू

आयपीएल (IPL) 2026 च्या 37 व्या सामन्यात चेन्नई सुपर किंग्सचा (Chennai super kings Captain Ruturaj Gaikwad made History) कर्णधार ऋतुराज गायकवाड याने एक मोठा टप्पा गाठला आहे. गुजरात टायटन्स विरुद्ध चेपॉक येथे खेळल्या जात असलेल्या सामन्यात गायकवाडने अशी कामगिरी केली, ज्यामुळे त्याचे नाव एमएस धोनी आणि सुरेश रैना यांसारख्या दिग्गजांच्या विशेष यादीत सामील झाले आहे.

गुजरात टायटन्स विरुद्धच्या सामन्यात ऋतुराज गायकवाडने आपला तिसरा षटकार ठोकताच IPL मध्ये चेन्नई सुपर किंग्ससाठी 100 षटकार पूर्ण केले. याचसह तो चेन्नईसाठी ही कामगिरी करणारा चौथा फलंदाज ठरला आहे. त्याच्याआधी ही कामगिरी एमएस धोनी, सुरेश रैना आणि शिवम दुबे यांनी केली आहे. या सामन्यात गायकवाडने कर्णधाराला साजेशी खेळी केली. त्याने 60 चेंडूत 74 धावा केल्या आणि तो नाबाद परतला. त्याच्या या खेळीत 6 चौकार आणि 4 षटकारांचा समावेश होता. या षटकारांनीच त्याला या खास क्लबमध्ये स्थान मिळवून दिले.

गायकवाड आतापर्यंत IPL मध्ये फक्त चेन्नई सुपर किंग्ससाठीच खेळला आहे. त्याने अवघ्या 79 सामन्यात 100 षटकार पूर्ण केले. ऋतुराज गायकवाडची IPL कारकीर्द अत्यंत शानदार राहिली आहे. त्याने लीगमध्ये 2665 धावा केल्या आहेत, ज्यामध्ये त्याचा स्ट्राईक रेट 135 पेक्षा जास्त आहे. त्याच्या नावावर 2 शतके आणि 21 अर्धशतके नोंदवली गेली आहेत, तर त्याची सर्वोच्च धावसंख्या नाबाद 108 धावा आहे. ऋतुराज गायकवाड आता अशा निवडक खेळाडूंमध्ये सामील झाला आहे, ज्यांनी CSK साठी 100 किंवा त्यापेक्षा जास्त षटकार मारले आहेत. या यादीत एमएस धोनी (234), सुरेश रैना (180) आणि शिवम दुबे (105) अशी मोठी नावे आहेत. इतकेच नाही तर गायकवाड आता CSK साठी सर्वाधिक धावा करणारा चौथा फलंदाज बनला आहे. त्याच्या पुढे आता फक्त धोनी (4865 धावा), रैना (4687 धावा) आणि फाफ डू प्लेसिस (2721 धावा) हे आहेत.

वर्ष 2020 मध्ये CSK शी जोडले गेल्यापासून ऋतुराज गायकवाड संघाचा महत्त्वाचा खेळाडू बनला आहे. त्याचा सर्वात उत्कृष्ट हंगाम 2021 चा होता, जेव्हा त्याने 635 धावा करून ऑरेंज कॅप जिंकली आणि संघाला चौथे IPL जेतेपद मिळवून देण्यात मोठी भूमिका बजावली. तसेच 2023 मध्येही त्याने 590 धावा करून आपली क्षमता सिद्ध केली.