भारताच्या आयर्लंड आणि इंग्लंड दौऱ्यासाठी टी-20 संघाची घोषणा उद्या म्हणजेच शनिवारी, 6 जून रोजी होण्याची शक्यता आहे. नव्या कर्णधारासह संघात अनेक आयपीएल स्टार्सना संधी मिळू शकते. ईएसपीएनक्रिकइन्फोच्या अहवालानुसार, आयपीएल 2026 मध्ये सर्वाधिक 776 धावा करत ऑरेंज कॅप जिंकणाऱ्या वैभव सूर्यवंशी यालाही पहिल्यांदाच वरिष्ठ भारतीय संघातून बोलावणे येऊ शकते.
वैभव सूर्यवंशीची निवड आयर्लंड दौऱ्यासाठी झाली आणि त्याला टीम इंडियाकडून पदार्पणाची संधी मिळाली, तर तो भारताकडून आंतरराष्ट्रीय क्रिकेटमध्ये पदार्पण करणारा सर्वात युवा खेळाडू ठरू शकतो. त्यामुळे ‘क्रिकेटचा देव’ म्हणून ओळखल्या जाणाऱ्या सचिन तेंडुलकर यांचा विक्रमही मोडला जाऊ शकतो.
सचिन तेंडुलकर यांनी 1989 मध्ये पाकिस्तानविरुद्ध आंतरराष्ट्रीय क्रिकेटमध्ये पदार्पण केले होते. त्यावेळी त्यांचे वय 16 वर्षे 205 दिवस होते. तर आज, 5 जून रोजी वैभव सूर्यवंशीचे वय 15 वर्षे 70 दिवस आहे. भारताचा आयर्लंडविरुद्धचा पहिला टी-20 सामना 26 जून रोजी होणार आहे. त्या सामन्यात वैभवला पदार्पणाची संधी मिळाल्यास तो सचिनचा हा ऐतिहासिक विक्रम मोडू शकतो.
माध्यमांतील वृत्तांनुसार, सूर्यकुमार यादवकडून टी-20 संघाचे कर्णधारपद काढून ते श्रेयस अय्यरकडे सोपवण्याचा विचार बीसीसीआय करत आहे. संघाच्या घोषणेसोबत नव्या कर्णधाराचीही घोषणा होण्याची शक्यता आहे.
श्रेयस अय्यरने 2023 नंतर भारतासाठी एकही टी-20 सामना खेळलेला नाही. मात्र, यावर्षी न्यूझीलंडविरुद्धच्या मालिकेत त्याची दुखापतग्रस्त खेळाडूच्या बदली म्हणून भारतीय संघात निवड झाली होती. मात्र त्याला अंतिम संघात संधी मिळाली नव्हती.
अय्यरचे नेतृत्व आयपीएल आणि देशांतर्गत क्रिकेटमध्ये उत्कृष्ट राहिले आहे. 2024 मध्ये त्याने केकेआर संघाला आयपीएल विजेतेपद मिळवून दिले होते. तर 2025 मध्ये पंजाब किंग्ज संघाचे नेतृत्व करत त्याने संघाला अंतिम फेरीपर्यंत नेले होते. अंतिम सामन्यात त्याला आरसीबीकडून पराभव स्वीकारावा लागला होता.
कर्णधारपदासोबतच अय्यरची फलंदाजीही टी-20 क्रिकेटमध्ये प्रभावी राहिली आहे. गेल्या दोन वर्षांत त्याने 1000 हून अधिक धावा केल्या असून, याच हंगामात त्याने आयपीएलमधील पहिले शतकही झळकावले आहे. त्यामुळे भारताच्या पुढील टी-20 कर्णधारपदासाठी तो प्रमुख दावेदार मानला जात आहे.
Comments are closed.