“तुला पुढच्या वर्षी मी विकत घेणार!” वैभव सूर्यवंशी लखनऊमध्ये जाणार? संजीव गोयंका पाहून गावस्करांचे मोठे वक्तव्य!

अवघ्या 15 व्या वर्षी गोलंदाजांची झोप उडवणाऱ्या वैभव सूर्यवंशीची क्रेझ आता सातव्या आसमानावर पोहोचली आहे. लखनऊ सुपर जायंट्सविरुद्धच्या सामन्यात वैभवने अशी तुफानी फलंदाजी केली की विरोधी संघाचे मालक संजीव गोयंका देखील त्याचे चाहते झाले. राजस्थान रॉयल्सच्या विजयानंतर गोयंका यांनी वैभव सूर्यवंशीचे भरभरून कौतुक केले. दोघांच्या भेटीनंतर आता महान फलंदाज सुनील गावस्कर यांनीही मोठे वक्तव्य केले आहे.

संजीव गोयंका यांनी सोशल मीडियावर वैभव सूर्यवंशीसोबतचे दोन फोटो शेअर केले. या फोटोंमध्ये वैभव गोयंकांच्या पाया पडताना दिसत आहे. या पोस्टच्या कॅप्शनमध्ये गोयंका यांनी लिहिले,

“संपूर्ण जगाने तुझी प्रतिभा पाहिली आहे. देशाला तुझ्यात भविष्य दिसत आहे. एवढ्या कमी वयात इतकी मोठी जबाबदारी तुझ्या खांद्यावर आहे आणि ते खांदे ती जबाबदारी समर्थपणे पेलतील. तुझा निरागसपणा कायम ठेव, तुझ्या प्रतिभेला आणखी धार दे आणि जग तुझ्या पायाशी असेल. वैभव, तुझ्यासाठी प्रार्थना, आशीर्वाद आणि खूप सारा प्रेम.”

हे दृश्य पाहून सुनील गावस्करही भारावून गेले. सामना संपल्यानंतर वैभव आणि गोयंका यांच्यातील संवाद पाहत गावस्कर मजेशीर अंदाजात म्हणाले, “लवकरच तुझ्यासाठी बोली लावणार आहे.”

आयपीएलमध्ये एखादा खेळाडू किती वर्षे एका फ्रेंचायझीसोबत राहील याची कोणतीही निश्चित मर्यादा नसली तरी राजस्थान रॉयल्स वैभवसारखा हिरा इतक्या लवकर सोडेल, अशी शक्यता खूपच कमी आहे. त्यामुळे गावस्कर यांचे वक्तव्य मजेशीर असले तरी वैभवला रिलीज करण्याचा विचार राजस्थानकडून होण्याची शक्यता सध्या तरी नाही.

सवाई मानसिंह स्टेडियमवर लखनऊ सुपर जायंट्सविरुद्ध वैभवची सुरुवात मात्र अपेक्षेप्रमाणे झाली नव्हती. पहिल्या 12 चेंडूत त्याने फक्त 11 धावा केल्या. त्यावेळी यशस्वी जयस्वाल 18 चेंडूत 37 धावांवर खेळत होता. मात्र त्यानंतर वैभवने गियर बदलला आणि सामन्याचा रंगच बदलून टाकला.

त्याने आकाश सिंहच्या एका षटकात तब्बल 26 धावा ठोकल्या, तर मयंक यादवच्या षटकात 29 धावांचा पाऊस पाडला. अवघ्या 23 चेंडूत अर्धशतक पूर्ण करत वैभवने उरलेल्या 43 धावा फक्त 15 चेंडूत चोपल्या आणि राजस्थानला शानदार विजय मिळवून दिला.