आयपीएल 2026 च्या अंतिम सामन्यात राजस्थान रॉयल्सचा संघ पोहोचू शकला नसला, तरी संघाचा युवा सलामीवीर आणि यंदाच्या हंगामातील सर्वात मोठी सनसनाटी ठरलेला वैभव सूर्यवंशी अहमदाबादमध्ये दाखल झाला आहे. तो रॉयल चॅलेंजर्स बंगळुरू आणि गुजरात टायटन्स यांच्यातील अंतिम सामना नरेंद्र मोदी स्टेडियममध्ये प्रत्यक्ष पाहणार आहे. मात्र, त्याच्या अहमदाबाद दौऱ्यामागचे कारण केवळ सामना पाहणे नाही.
वैभव सूर्यवंशीने आयपीएल 2026 मध्ये दमदार कामगिरी करत अनेक वैयक्तिक पुरस्कारांवर जवळपास शिक्कामोर्तब केले आहे. फायनलनंतर होणाऱ्या पुरस्कार वितरण सोहळ्यात हे पुरस्कार स्वीकारण्यासाठी तो स्वतः अहमदाबादला पोहोचला आहे. अन्यथा त्याच्या वतीने फ्रँचायझीचा प्रतिनिधी हे पुरस्कार स्वीकारू शकला असता. वैभव दुपारी सुमारे 3 वाजता सरदार वल्लभभाई पटेल आंतरराष्ट्रीय विमानतळावर दाखल झाला.
आयपीएलच्या 19 व्या हंगामाचा अंतिम सामना आरसीबी आणि गुजरात टायटन्स यांच्यात खेळवला जाणार आहे. या सामन्यानंतर बीसीसीआयकडून विविध वैयक्तिक पुरस्कार जाहीर केले जातील. त्यापैकी किमान तीन पुरस्कार वैभव सूर्यवंशीच्या नावावर निश्चित मानले जात आहेत.
यामध्ये सर्वप्रथम सर्वाधिक षटकारांचा पुरस्कार आहे. वैभवने यंदाच्या हंगामात तब्बल 72 षटकार ठोकले असून या शर्यतीत त्याच्या जवळपासही कोणताही फलंदाज नाही.
याशिवाय ‘इमर्जिंग प्लेयर ऑफ द इयर’ हा पुरस्कारही वैभवच्या खात्यात जाण्याची दाट शक्यता आहे. संपूर्ण हंगामात त्याने सातत्यपूर्ण आणि आक्रमक फलंदाजी करत सर्वाधिक धावा, सर्वाधिक षटकार आणि सर्वाधिक चौकारांची नोंद केली आहे.
तिसरा पुरस्कार ‘सुपर स्ट्रायकर ऑफ द सीझन’ असण्याची शक्यता आहे. वैभवने 237 पेक्षा जास्त स्ट्राइक रेटने धावा करत या विभागातही आघाडी घेतली आहे.
दरम्यान, वैभव सूर्यवंशी ऑरेंज कॅपचाही दावेदार आहे. गुजरात टायटन्सचे शुबमन गिल 55 धावा आणि साई सुदर्शन 67 धावा करण्यात अपयशी ठरल्यास ऑरेंज कॅप वैभवच्या नावावर जाऊ शकते.
याशिवाय ‘मोस्ट व्हॅल्युएबल प्लेयर’ अर्थात ‘प्लेयर ऑफ द टूर्नामेंट’ पुरस्कार जिंकण्याचीही त्याला संधी आहे. मात्र, त्यासाठी अंतिम सामन्यात कगिसो रबाडाची कामगिरी कशी होते यावरही बरेच काही अवलंबून असेल. फायनलमध्ये मैदानात उतरण्याची संधी नसली तरी आयपीएल 2026 च्या पुरस्कार सोहळ्यात वैभव सूर्यवंशी सर्वाधिक चर्चेत राहण्याची शक्यता आहे.
Comments are closed.