दुलीप ट्रॉफीसाठी वैभव सूर्यवंशीचा जोरदार सराव, डिफेंसवर देतोय विशेष भर

टीम इंडियाचा 15 वर्षांचा युवा फलंदाज वैभव सूर्यवंशी आता दुलीप ट्रॉफीमध्ये खेळताना दिसणार आहे. या स्पर्धेसाठी त्याची ईस्ट झोन संघाच्या उपकर्णधारपदी निवड झाली आहे. इंग्लंड दौऱ्यावर आंतरराष्ट्रीय पदार्पण केल्यानंतर त्याने झिम्बाब्वेविरुद्ध उत्कृष्ट कामगिरी केली आणि आता तो अंतर्गत क्रिकेटमधील एका नवीन जबाबदारीसाठी सज्ज झाला आहे. दुलीप ट्रॉफी 2026-27 मध्ये वैभव आपल्या फलंदाजीने छाप पाडण्याचा प्रयत्न करेल. विशेष म्हणजे रेड बॉल क्रिकेटमध्ये त्याची आतापर्यंतची कामगिरी फारशी चांगली राहिलेली नाही.

दुलीप ट्रॉफीसाठी वैभवने आपली तयारी अधिक तीव्र केली आहे. त्याने सोशल मीडियावर सरावाचा एक व्हिडिओ शेअर केला आहे, ज्यामध्ये तो नेट्समध्ये फलंदाजी करताना दिसत आहे. हा युवा फलंदाज नेट प्रॅक्टिसदरम्यान चेंडू ‘डिफेंड’ करण्यावर जास्त भर देत आहे. यासोबतच त्याने आक्रमक शॉट्सवरही काम केले आहे. हा व्हिडिओ शेअर करताना वैभवने कॅप्शनमध्ये ‘preoaration’ असे लिहिले आहे. येणाऱ्या आव्हानासाठी स्वतःला तयार करण्यावर वैभवचे पूर्ण लक्ष आहे. आपल्या व्हाईट बॉल पदार्पणानंतर वैभव आता रेड बॉल क्रिकेटवर फोकस करत आहे.

​वैभव याआधी झिम्बाब्वे मालिकेत खेळताना दिसला होता. इंग्लंड दौऱ्यातील खराब कामगिरीनंतर वैभवने या मालिकेत जबरदस्त फलंदाजी केली. झिम्बाब्वेविरुद्ध त्याने तीन टी-20 आंतरराष्ट्रीय डावांमध्ये 151 धावा केल्या आणि तो या मालिकेत सर्वाधिक धावा करणारा फलंदाज ठरला. या दरम्यान त्याची सरासरी 50.33 आणि स्ट्राइक रेट 196.10 होता. त्याने एका डावात 81 धावांची खेळीही केली. त्याच्या या दमदार कामगिरीमुळे त्याला ‘प्लेअर ऑफ द सिरीज’चा पुरस्कार मिळाला. आता तो हाच फॉर्म दलीप ट्रॉफीमध्येही कायम ठेवण्याचा प्रयत्न करेल.

​ईस्ट झोनने आगामी दुलीप ट्रॉफीसाठी ईशान किशनला कर्णधार बनवले आहे. दलीप ट्रॉफीची सुरुवात 23 ऑगस्टपासून होणार आहे. ईस्ट झोन आपल्या मोहिमेची सुरुवात नॉर्थ ईस्ट झोनविरुद्ध करेल. वैभव या स्पर्धेत मोठ्या फॉरमॅटमधील आपली आकडेवारी सुधारण्याचा प्रयत्न करेल. त्याने आतापर्यंतच्या कारकिर्दीत 8 प्रथम श्रेणी सामने खेळले असून, 12 डावांमध्ये 17.25 च्या सरासरीने 207 धावा केल्या आहेत.