10 हजार धावा करणाऱ्या दिग्गज इंग्लिश क्रिकेटपटूची निवृत्ती; भारताच्या विरुद्ध केलं होतं पदार्पण!

36 वर्षीय लियाम डॉसनने तत्काळ प्रभावाने प्रथम श्रेणी (Red-Ball) क्रिकेटमधून निवृत्ती घेण्याचा निर्णय घेतला आहे. हॅम्पशायर काउंटी क्रिकेट क्लबसाठी प्रदीर्घ काळ खेळणाऱ्या डॉसनने आपल्या पांढऱ्या चेंडूच्या (White-Ball) कारकिर्दीवर लक्ष केंद्रित करण्यासाठी हा मोठा निर्णय घेतला आहे.

13 मे रोजी आपले पत्रक प्रसिद्ध करताना डॉसन म्हणाला, “प्रथम श्रेणी क्रिकेटमधून निवृत्त होण्याचा निर्णय माझ्यासाठी सोपा नव्हता. परंतु, मर्यादित षटकांच्या क्रिकेटमधील माझी कारकीर्द वाढवण्यासाठी हीच योग्य वेळ असल्याचे मला वाटते. हॅम्पशायरसाठी 200 हून अधिक सामने खेळल्याचा मला अभिमान आहे आणि इथल्या अनेक आठवणी माझ्या हृदयात कायम राहतील.

डॉसनने आपल्या कारकिर्दीत 10,000 हून अधिक धावा केल्या आणि 380 विकेट्स घेतल्या. यामध्ये 18 शतकांचा समावेश आहे. त्याने इंग्लंडसाठी 4 कसोटी सामने खेळले. विशेष म्हणजे, भारतांविरुद्धच्या कसोटी पदार्पणात त्याने नाबाद 66 धावांची खेळी केली होती.

2024 हे वर्ष डॉसनसाठी सर्वात यशस्वी ठरले. त्याला ‘मेन्स प्लेयर ऑफ द इयर’ (PCA), ‘डोमेस्टिक MVP’ आणि ‘काउंटी चॅम्पियनशिप प्लेयर ऑफ द इयर’ या पुरस्कारांनी सन्मानित करण्यात आले होते. 2014 मध्ये हॅम्पशायरला डिव्हिजन 2 मधून बढती मिळवून देण्यात त्याचा मोठा वाटा होता. तेव्हापासून सलग 11 वर्षे हा संघ डिव्हिजन 1 मध्ये टिकून आहे.

2026 च्या हंगामात हॅम्पशायरसाठी चार काउंटी सामने खेळल्यानंतर डॉसनला अपेक्षित यश मिळाले नाही, त्यानंतर त्याने लाल चेंडूचे क्रिकेट सोडण्याचा निर्णय घेतला. तो आता हॅम्पशायरसाठी ‘टी-20 ब्लास्ट’ आणि ‘वनडे कप’ खेळत राहील. तसेच तो ‘द हंड्रेड’ स्पर्धेत ‘मँचेस्टर ओरिजिनल्स’ कडून खेळताना दिसेल. इंग्लंडच्या मर्यादित षटकांच्या संघातही तो आपली सेवा सुरू ठेवण्याची शक्यता आहे.