हल्ली मेकअप हा फक्त सौंदर्याचा भाग राहिलेला नाही, तर तो अनेकांच्या दैनंदिन आयुष्याचा अविभाज्य भाग बनला आहे. ऑफिस, कॉलेज, पार्टी किंवा सोशल मीडियासाठी आकर्षक दिसण्याची इच्छा प्रत्येकालाच असते. मात्र, चेहऱ्यावरील सौंदर्य खुलवणारी प्रत्येक ब्युटी प्रोडक्ट सुरक्षित असेलच, असे नाही. काही प्रोडक्टमध्ये वापरली जाणारी रसायने त्वचेपासून थेट शरीरात प्रवेश करून दीर्घकाळात गंभीर आरोग्याच्या समस्या निर्माण करू शकतात. त्यामुळे मेकअप करताना केवळ रंग आणि ब्रँड नाही, तर त्यामागील घटक समजून घेणेही तितकेच आवश्यक आहे.
मेकअपमधील घातक रसायने
काही ब्युटी प्रोडक्ट्समध्ये फॉर्मल्डिहाइड, पॅराबेन्स, फ्थॅलेट्स आणि शिसे यांसारख्या रसायनांचा वापर केला जातो या घटकांचा दीर्घकाळ संपर्क त्वचेची अॅलर्जी जळजळ हार्मोनल असंतुलन आणि इतर आरोग्यविषयक समस्या निर्माण करू शकतो त्यामुळे कोणतेही प्रोडक्ट खरेदी करण्यापूर्वी त्यावरील इंग्रीडिएंट यादी वाचण्याची सवय लावणे महत्त्वाचे आहे
लिपस्टिक निवडताना गुणवत्ता पाहा
स्वस्त किंवा निकृष्ट दर्जाच्या काही लिपस्टिकमध्ये शिसे आणि इतर जड धातूंचे अंश असू शकतात. हे घटक हळूहळू शरीरात जमा होत जातात. सततच्या वापरामुळे मज्जासंस्था, मूत्रपिंड आणि हार्मोनल संतुलनावर परिणाम होण्याची शक्यता वाढू शकते.
फाउंडेशन आणि कॉम्पॅक्ट
फाउंडेशन आणि कॉम्पॅक्ट त्वचेवर दीर्घकाळ राहतात. त्यामध्ये असलेले काही प्रिझर्व्हेटिव्ह्ज, पॅराबेन्स आणि सिलिकॉन त्वचेच्या छिद्रांमधून शरीरात जाऊ शकतात. त्यामुळे शक्यतो त्वचेला अनुरूप, प्रमाणित आणि सुरक्षित घटक असलेली उत्पादनेच निवडावीत.
मस्कारा आणि आयलाइनर
मस्कारा आणि आयलाइनर हे डोळ्यांच्या अतिशय संवेदनशील भागाजवळ वापरले जातात. त्यामुळे दर्जाहीन किंवा कालबाह्य उत्पादने वापरल्यास डोळ्यांची जळजळ, संसर्ग आणि रसायनांचा दीर्घकालीन दुष्परिणाम होण्याचा धोका वाढू शकतो.
नेल पॉलिश
अनेक नेलपॉलिशमध्ये टोल्युइन, फॉर्मल्डिहाइड आणि डायब्युटिल फ्थॅलेट यांसारखी रसायने असू शकतात. यांचा वारंवार वापर केल्यास हार्मोनल असंतुलन, प्रजनन आरोग्यावर परिणाम आणि इतर विषारी दुष्परिणाम होण्याची शक्यता व्यक्त केली जाते. त्यामुळे शक्यतो “टॉक्सिन-फ्री” किंवा प्रमाणित ब्रँडची उत्पादने वापरणे अधिक सुरक्षित ठरते.
ब्युटी प्रोडक्ट्स खरेदी करताना या चुका टाळा
– विश्वासार्ह आणि प्रमाणित ब्रँडची उत्पादनेच खरेदी करा.
– एक्सपायरी डेट आणि घटकांची यादी तपासल्याशिवाय प्रोडक्ट वापरू नका.
– बनावट किंवा अतिशय स्वस्त उत्पादने वापरणे टाळा.
– नवीन उत्पादन वापरण्यापूर्वी पॅच टेस्ट अवश्य करा.
– त्वचेवर खाज, पुरळ, जळजळ किंवा सूज दिसल्यास त्वरित वापर थांबवा आणि त्वचारोगतज्ज्ञांचा सल्ला घ्या.
Comments are closed.