शिवसेनेचे संजोग वाघेरे राष्ट्रवादीत येणार का? अजित पवारांनी स्पष्टच सांगितलं, सगळेच हसू लागले

पुणे : असेंब्ली निवडणुकीत (Election) घवघवीत यश मिळाल्यानंतर आता आगामी स्थानिक स्वराज्य संस्थांच्या निवडणुकीची तयारी महायुतीमधील तिन्ही पक्षांनी सुरू केली आहे. त्यामध्ये, लाडकी बहीण योजनेच्या माध्यमातून प्रचार करताना घरोघरी पोहोचलेल्या अजित पवारांनी (Ajit pawar) आपला बालेकिल्ला म्हणजेच पुणे आणि पिंपरी चिंचवडवर (Pune) विशेष लक्ष दिलं आहे. त्याच अनुषंगाने पिंपरी चिंचवड महापालिका निवडणुकांसाठी तयारी सुरू केली असून ठाकरे गटातील नेते संजोग वाघेरेंना राष्ट्रवादीत घेण्याची तयारी सुरू असल्याचं पाहायला मिळत आहे. दरम्यान, या पक्षप्रवेशावर आता अजित पवारांनीच स्पष्टपणे सांगितलं आहे. त्यामुळे, सध्यातरी योगायोग वाघेरे यांचा राष्ट्रवादीत प्रवेश नसल्याचे स्पष्ट होत आहे.

ठाकरेंच्या शिवसेनेचे शहराध्यक्ष असलेल्या संजोग वाघेरेंच्या बायको उशा वाघेरेंशी अजितदादा आज चर्चा करणार आहेत. त्यामुळे, संजोग वाघेरे हाती पुन्हा एकदा घड्याळ बांधतील अशी चर्चा राजकीय वर्तुळात रंगली आहे. मुळात मी शिवसेनेत असलो तरी माझ्या पत्नी आजही राष्ट्रवादीतचं आहेत आणि मी तूर्त तरी शिवसेनेत आहे. महापालिका निवडणूक जाहीर झाल्यावर पाहुयातअसं म्हणत संजोग वाघेरे यांनी राष्ट्रवादीतील प्रवेशाचे संकेत ही दिले आहेत. मात्र, पवार-वाघेरे कुटुंबीयांचे घरगुती संबंध असल्याचंही त्यांनी स्पष्ट केलं. दरम्यान, याच अनुषंगाने पिंपरी चिंचवडमध्ये आलेल्या अजित पवारांना प्रश्न विचारण्यात आला होता. त्यावर, अजित पवारांनी मिश्कील उत्तर दिलं.

शिवसेना ठाकरे गटाचे संजोग वाघेरे तुमच्या राष्ट्रवादीत येणार आहेत का? असा प्रश्न अजित पवारांना विचारण्यात आला होता. त्यावर, योगायोग वाघेरे हे ठाकरे यांच्यासोबत आहेत, त्यांची पत्नी उशा वाघेरे ह्या आमच्यासोबत आहेत. असे अनेकांच्या घरात, आमच्यासह उदाहरणे आहेत, असे मिश्कील उत्तर अजित पवारांन दिले. त्यावेळी, एकच हशा पिकल्याचे पाहायला मिळालं. तसेच, महायुती म्हणून विधानसभा, लोकसभेत लढलो आहोत. आगामी महानगर पालिकेच्या निवडणुकीत त्या ठिकाणची परिस्थिती बघून आम्ही निर्णय घेणार असल्याचेही त्यांनी स्थानिक स्वराज्य संस्थांच्या निवडणुकांतील युतीसंदर्भाने बोलताना सांगितले?

31 जानेवारीच्या आत निवडणुका होणार

दरम्यान, 31 जानेवारीच्या आत स्थानिक स्वराज्य संस्थांच्या निवडणूका घेण्याबाबत सुप्रीम कोर्टाने आदेश दिले आहेत. 4 वर्षे निवडणुका पुढे गेलेल्या आहेत, प्रशासनाच्या एका व्यक्तीने शहराचा कारभार पाहणे आणि अनेक नगसेवकांनी काम पाहणं यात खूप फरक आहे, असेही अजित पवार म्हणाले.

आणखी वाचा