आज इथं मत मागताना आनंद होतोय; गुवाहटीफेम शहाजी बापूंच्या सांगोल्यात मुख्यमंत्री असं का म्हणाले?

सोलापूर : यंदाच्या स्थानिक स्वराज्य संस्थांच्या निवडणुकांच्या (Election) अनुषंगाने महायुतीत चांगलेच खटके उडाल्याचं पाहायला मिळालं. सोलापूर जिल्ह्यात बहुतांश तालुक्यात भाजपने स्वबळावर निवडणूक लढवली असून सांगोल्यातही तसेच चित्र पाहायला मिळालं. त्यामुळे, सांगोल्यात भाजपने विश्वासघात केल्याचं सांगत माजी आमदार शहाजी बापू पाटील यांनी भाजपवर हल्लाबोल करत मुख्यमंत्री देवेंद्र फडणवीस यांना सवाल केला होता. आता, त्याच सांगोल्यात मुख्यमंत्री देवेंद्र फडणवीस यांनी सभा घेत मतदारांना आवाहन केलंय. सांगोल्याचा (Solapur) चेहरा मोहरा बदलण्यासाठी तुम्ही मला दोन तारखेपर्यंत सांभाळा मी तुम्हाला पुढील पाच वर्ष सांभाळतो असे फडणवीस यांनी जाहीर सभेतून म्हटलं. यावेळी, सांगोल्याचे दिवंगत नेते गणपतराव देशमुख यांच्या आठवणीही जागवल्या.

सांगोल्याचा चेहरा मोहरा बदलण्यासाठी तुम्ही ही नगरपालिका निवडून आणा, देवाभाऊ सहित संपूर्ण सरकार तुमच्या पाठीशी खंबीरपणे उभे करतो, असे आश्वासन यावेळी मुख्यमंत्री फडणवीस यांनी दिले. शहाजी बापू पाटील यांनी केलेल्या टीकेमुळे सांगोल्यात आज देवाभाऊ काय बोलणार याकडे सर्वांचे लक्ष होते. त्यातच गेल्या आठवड्यात उपमुख्यमंत्री एकनाथ शिंदे यांनी भाजप आणि पालकमंत्र्यांना इशारा देत शहाजी बापूंच्या मागे मी खंबीरपणे उभा आहे, असे म्हटले होते. त्यामुळे,देवेंद्र फडणवीस आज काय बोलणार याकडे सर्वांचे लक्ष होते. मात्र, त्यांनी कोणावरही टीका टिप्पणी करणार नसून केवळ विकासावर बोलणार असल्याचे सांगितले. संपूर्ण भाषण त्यांनी विकासाच्या प्रश्नावर केले.

आज मत मागताना मला अधिक आनंद होतोय

मी यापूर्वीही सांगोल्यात प्रचाराला येत होतो. मात्र, जे माझे आदर्श होते त्या स्व. गणपतराव देशमुख यांच्या विरोधात मला मत मागावे लागत होते. मात्र, यावेळी डॉक्टर बाबासाहेब देशमुख आणि आम्ही एकत्र लढत असल्याने हे मत मागताना मला खूप आनंद होत आहे. सांगोल्यात आघाडी करताना शेकाप आणि भाजप एकत्र येत होते, त्यावेळी बापूंशीही बोलून शहराच्या विकासासाठी सर्वांनी एकत्र येण्याचे आवाहन मी केले होते, असेही फडणवीसांनी सांगितले. आपल्याकडे नीती, नियत आणि मोदी साहेबांचा निधी असल्याने आपण राज्यातील सर्व नगरपालिकेत शहरांचे चेहरे-मोहरे बदलू, असे आश्वासन देखील यावेळी मुख्यमंत्री फडणवीस यांनी दिले.

हेही वाचा

नगरपालिकेच्या मतदानादिवशी कामगारांना सुट्टी न दिल्यास कारवाई; काय सांगतो लोकप्रतिनिधित्व कायदा?

आणखी वाचा