राजस्थान रॉयल्सला मिळाला नवीन मालक; 'स्टील किंग'ने 15,660 कोटी रुपयांना खरेदी केली फ्रँचायझी!

आयपीएलच्या वर्तुळात एक मोठी खळबळ पाहायला मिळाली आहे. पोलाद उद्योगातील दिग्गज लक्ष्मी मित्तल यांनी राजस्थान रॉयल्स फ्रँचायझीच्या अधिग्रहणाची घोषणा केली असून, यामुळे क्रिकेट आणि व्यापार या दोन्ही क्षेत्रांत चर्चांना उधाण आले आहे. ब्रिटनमध्ये स्थायिक झालेले भारतीय वंशाचे उद्योगपती लक्ष्मी मित्तल यांनी सांगितले की, जयपूरस्थित या संघाला खरेदी करण्यासाठी अंतिम करार झाला आहे. हा व्यवहार सुमारे १.६५ अब्ज डॉलर म्हणजेच जवळपास १५,६६० कोटी रुपयांना झाला आहे. या कंसोर्टियममध्ये (गटामध्ये) अदार पूनावाला आणि विद्यमान मालक मनोज बदाले यांचाही समावेश आहे.

​या घोषणेने सर्वांनाच चकित केले आहे, कारण यापूर्वी अमेरिकन उद्योगपती काल सोमानी यांच्या नेतृत्वाखालील गट नवीन मालक असेल असे मानले जात होते, ज्यामध्ये रॉब वॉल्टन आणि फोर्ड कुटुंबातील सदस्यांचा समावेश होता. २००८ मध्ये आयपीएलचे पहिले विजेतेपद पटकावणारी राजस्थान रॉयल्स सध्या आयपीएल २०२६ मध्ये उत्कृष्ट फॉर्ममध्ये असून प्लेऑफच्या दिशेने वाटचाल करत आहे, जिथे तरुण स्टार वैभव सूर्यवंशी सातत्याने चमक दाखवत आहे.

​’क्रिकबज’च्या अहवालानुसार, या करारानुसार मित्तल कुटुंब संघाचे नियंत्रण स्वतःच्या हातात ठेवणार असून त्यांच्याकडे सुमारे ७५ टक्के भागीदारी असेल. अदार पूनावाला यांच्याकडे १८ टक्के भागीदारी असेल, तर उर्वरित ७ टक्के भागीदारी विद्यमान गुंतवणूकदारांकडे कायम राहील. मनोज बदाले, जे आतापर्यंत प्रमुख मालक होते, ते संघाशी जोडलेले राहतील आणि आपल्या अनुभवाने फ्रँचायझीला मार्गदर्शन करत राहतील.

​या अधिग्रहणामध्ये दक्षिण आफ्रिकेतील ‘पार्ल रॉयल्स’ आणि कॅरिबियनमधील ‘बार्बाडोस रॉयल्स’ यांचाही समावेश आहे. मात्र, हा व्यवहार बीसीसीआय (BCCI), सीसीआय (CCI) आणि आयपीएल गव्हर्निंग कौन्सिलच्या मंजुरीनंतरच पूर्ण होईल, ज्याची अपेक्षा २०२६ च्या तिसऱ्या तिमाहीत वर्तवण्यात आली आहे. लक्ष्मी मित्तल यांचे राजस्थानशी खास नाते आहे, कारण त्यांचा जन्म राज्यातील सादुलपूर गावात झाला होता. याच कारणामुळे हा व्यवहार त्यांच्यासाठी भावनिकदृष्ट्याही महत्त्वाचा आहे.

​लक्ष्मी मित्तल यांनी संयुक्त निवेदनात म्हटले आहे की, त्यांचे कुटुंब राजस्थानचे आहे, त्यामुळे राजस्थान रॉयल्सपेक्षा अधिक कोणत्याही आयपीएल संघाचा भाग होणे त्यांना आवडले नसते. त्यांनी पहिल्यांदा क्रिकेट शालेय जीवनात खेळले होते आणि तेव्हापासून ते या खेळाचे मोठे चाहते आहेत. अनेक महान खेळाडूंनी राजस्थान रॉयल्सची जर्सी परिधान केली आहे, ज्यामध्ये भारतीय क्रीडा क्षेत्रातील अशा दिग्गजांचा समावेश आहे ज्यांनी तरुण प्रतिभांना प्रेरित केले आहे. या शानदार संघाचा भाग होण्यासाठी ते उत्साही असून भविष्यातील यशासाठी चाहत्यांसह मैदानाच्या कडेला उभे राहून संघाला पाठिंबा देण्यासाठी ते उत्सुक आहेत. या मोठ्या गुंतवणुकीमुळे राजस्थान रॉयल्सच्या एका नवीन युगाची सुरुवात मानली जात आहे, जिथे मजबूत नेतृत्व आणि मोठ्या संसाधनांच्या जोरावर संघ आगामी काळात आणखी उंची गाठू शकेल.