कल्याण बॅनर्जींच्या हल्ल्याच्या दाव्यावर भाजपची पहिली प्रतिक्रिया; म्हणाले, ‘हा फक्त आणि फक्त ड

हुगळी: पश्चिम बंगालच्या हुगळी जिल्ह्यातील चंडीतला पोलीस ठाण्याच्या परिसरात तृणमूल काँग्रेसचे (TMC) खासदार कल्याण बॅनर्जी यांच्यावर कथित हल्ला झाल्याचा प्रकार समोर आल्यानंतर या भागात कमालीचा तणाव निर्माण झाला आहे. भारतीय जनता पक्षाच्या (BJP) कार्यकर्त्यांनी आपल्यावर हल्ला केला असून डोक्यात दगड किंवा चेंडूसारखी वस्तू मारून आपल्याला जखमी केले, असा थेट आरोप टीएमसी खासदार कल्याण बॅनर्जी यांनी केला आहे. दुसरीकडे, भाजपने हे सर्व आरोप फेटाळून लावले असून कल्याण बॅनर्जी यांना कोणतीही दुखापत झालेली नाही आणि ते केवळ ‘ड्रामा’ करत असल्याची पहिली प्रतिक्रिया दिली आहे.

Kalyan Banerjee Attack Allegation: भाजपचा पलटवार

भाजपने कल्याण बॅनर्जी यांचे आरोप पूर्णपणे फेटाळले आहेत. कल्याण बॅनर्जी यांना कोणतीही जखम झालेली नाही, ते केवळ राजकीय सहानुभूती मिळवण्यासाठी मुद्दाम “ड्रामा” करत असल्याचा आरोप भाजपने केला आहे. अभिषेक बॅनर्जी यांच्या प्रकरणावरून लोकांचे लक्ष भटकावण्यासाठी हा सर्व प्रकार केला जात असल्याचे पक्षाचे म्हणणे आहे.

भाजप नेते देबजीत सरकार यावर बोलताना म्हणाले, “टीएमसी खासदार कल्याण बॅनर्जी यांनी पुढच्या वेळी आपल्या ड्राम्याची तालीम (रिहर्सल) आणखी चांगल्या पद्धतीने करायला हवी. ते दावा करत आहेत की भाजप कार्यकर्त्यांनी त्यांना मारले, पण त्यानंतर लगेचच ते अत्यंत नाटकीय पद्धतीने जमिनीवर पडतात; विशेष म्हणजे यादरम्यान त्यांचा फोन अजूनही कानाला लावलेला असतो आणि ते कोणताही अडथळा न येता फोनवर बोलणे सुरूच ठेवतात.”

Kalyan Banerjee Attack Allegation: निवेदन देण्यासाठी गेले होते खासदार

मिळालेल्या माहितीनुसार, खासदार कल्याण बॅनर्जी हे चंडीतला पोलीस ठाण्यात निवेदन देण्यासाठी पोहोचले होते. अभिषेक बॅनर्जी यांच्यावर झालेला कथित हल्ला आणि अटक करण्यात आलेल्या टीएमसी कार्यकर्त्यांची सुटका करण्यात यावी, अशी मागणी ते करत होते. मात्र, निवेदन सादर करण्यापूर्वीच पोलीस ठाण्याच्या बाहेर टीएमसी आणि भाजप कार्यकर्त्यांमध्ये जोरदार घोषणाबाजी सुरू झाली.

Kalyan Banerjee Attack Allegation: घोषणाबाजीमुळे वातावरण बिघडले; पोलीस आणि सुरक्षा दल तैनात

भाजप कार्यकर्त्यांनी टीएमसी समर्थकांविरोधात “चोर-चोर” अशा घोषणा दिल्या, ज्यावरून तिथले वातावरण अधिकच तणावपूर्ण बनले. परिस्थिती नियंत्रणात आणण्यासाठी घटनास्थळी मोठा पोलीस बंदोबस्त आणि केंद्रीय सुरक्षा दल तैनात करण्यात आले. याच गदारोळात कोणीतरी कल्याण बॅनर्जी यांच्यावर चेंडू किंवा दगडासारख्या वस्तूने हल्ला केला, ज्यामध्ये त्यांच्या डोक्याला दुखापत झाल्याचे सांगितले जात आहे.

Kalyan Banerjee Attack Allegation: कल्याण बॅनर्जी यांचे आरोप

डोक्यावर ओला रुमाल ठेवून प्रसारमाध्यमांसमोर आलेल्या कल्याण बॅनर्जी यांनी आरोप केला की, चंडीतला पोलीस ठाण्यात निवेदन देण्यासाठी जात असतानाच त्यांच्यावर हा हल्ला करण्यात आला. लोकशाही मार्गाने विरोध नोंदवण्यासाठी जाणाऱ्या लोकांवर अशा प्रकारे हल्ला केला जाणे अत्यंत गंभीर असून ही बाब पूर्णपणे निषेधार्ह आहे, असे बॅनर्जी म्हणाले.

दरम्यान, यापूर्वी टीएमसीचे अभिषेक बॅनर्जी हे दक्षिण २४ परगणा जिल्ह्यातील सोनारपूर येथे निवडणूक निकालानंतर झालेल्या हिंसेतील पीडित कुटुंबांना भेटायला गेले असता, त्यांच्यावरही एका जमावाने कथित हल्ला केला होता. या घटनेनंतर आधीच संपूर्ण राज्यात राजकीय वातावरण तापलेले असताना आता कल्याण बॅनर्जी यांच्या प्रकरणावरून टीएमसी आणि भाजपमधील आरोप-प्रत्यारोपांची मालिका आणखी तीव्र झाली आहे.

1/2

TMC खासदार कल्याण बॅनर्जी यांना पुढच्या वेळी त्यांच्या नाटकाची उत्तम तालीम करण्याची गरज आहे.

भाजप कार्यकर्त्यांनी आपल्याला मारहाण केल्याचा त्यांचा दावा आहे. तरीही, लगेचच, तो नाटकीयपणे जमिनीवर पडतो आणि त्याचा फोन कानाला दाबून ठेवतो आणि कोणत्याही व्यत्ययाशिवाय कॉलवर बोलत राहतो. pic.twitter.com/72V81u2heR

— देबजित सरकार (@Bjp_Debjit) 31 मे 2026

आणखी वाचा