आधी अनिकेत तटकरे अन् आता राजेंद्र जैन यांना उमेदवारी; राष्ट्रवादीतून साईडलाईन झाल्याची चर्चा अस

राज्यसभा निवडणूक 2026: सुनेत्रा पवार यांच्या राजीनाम्यामुळे रिक्त झालेल्या राज्यसभेच्या जागेवर प्रफुल पटेल यांचे निकटवर्तीय राजेंद्र जैन यांची वर्णी लागली आहे. शेवटच्या क्षणापर्यंत राज्यसभेच्या या जागेसाठी छगन भुजबळ (Chhagan Bhujbal) यांचे नाव पक्के मानले जात होते. मात्र, रविवारी रात्री मुंबईत पार पडलेल्या राष्ट्रवादी काँग्रेसच्या (NCP) कोअर कमिटीच्या बैठकीत अनपेक्षितपणे राजेंद्र जैन यांचे नाव समोर येऊन त्यांच्या राज्यसभेच्या उमेदवारीवर शिक्कामोर्तब होताच राजकीय वर्तुळाला काहीसा आश्चर्याचा धक्का बसला. छगन भुजबळ यांनी आपले पुतणे समीर भुजबळ (Sameer Bhujbal) यांचा राज्य मंत्रिमंडळात समावेश करावा, अशी अट ठेवली होती. हीच अट छगन भुजबळ यांच्या दिल्लीत राज्यसभेवर (Rajya Sabha Election 2026)जाण्याच्या मार्गातील धोंडा ठरल्याचे सांगितले जाते. त्यामुळे अगदी शेवटच्या क्षणी राष्ट्रवादी काँग्रेसचे ज्येष्ठ नेते प्रफुल पटेल यांचे अत्यंत विश्वासू मानले जाणारे राजेंद्र जैन यांना राज्यसभेची उमेदवारी देण्यात आली. (Maharashtra Politics News)

राजेंद्र जैन यांची राज्यसभेसाठी निवड झाल्यानंतर राजकीय वर्तुळात सुनील तटकरे आणि प्रफुल पटकरे या जोडगोळीच्या अजूनही कायम असलेल्या वर्चस्वाची चर्चा रंगली आहे. यंदाच्या विधानपरिषद निवडणुकीत रायगडमध्ये भाजप आणि शिंदे गटात प्रचंड रस्सीखेच असतानाही सुनील तटकरे यांनी आपले सर्वपक्षीय संबंध आणि राजकीय अनुभव वापरुन त्यांचे पुत्र अनिकेत तटकरे यांना उमेदवारी मिळवून दिली. एवढेच नव्हे तर अनिकेत तटकरे यांची रायगड विधानपरिषदेतून बिनविरोध निवडही झाली. हे अर्थातच सुनील तटकरे यांचे यश मानले जात आहे. त्यापाठोपाठ रविवारी छगन भुजबळ यांच्यासारखा तगडा नेता रिंगणात असताना अनपेक्षितपणे शेवटच्या क्षणी प्रफुल पटेल यांचे कट्टर समर्थक राजेंद्र जैन यांना उमेदवारी मिळाली आहे. यानिमित्ताने राजकीय वर्तुळात तटकरे-पटेल यांच्या या यशाची चांगलीच चर्चा रंगली आहे.

अवघ्या काही दिवसांपूर्वी सुनेत्रा पवार यांनी केंद्रीय निवडणूक आयोगाकडे राष्ट्रवादी काँग्रेसच्या कार्यकारिणीची यादी पाठवली होती. या यादीत सुनील तटकरे आणि प्रफुल पटेल यांच्या नावापुढे पदाचा उल्लेख नसल्याने एकच गहजब झाला होता. तटकरे-पटेलांची पदावरुन उचलबांगडी करण्यात आल्याची आणि सुनेत्रा पवार या दोघांवर प्रचंड नाराज असल्याचे वृत्त तेव्हा पसरले होते. यानंतर काही दिवस सुनील तटकरे आणि प्रफुल पटेल यांना राष्ट्रवादी काँग्रेसमध्ये साईडलाईन करण्यात आल्याचेही सांगितले जात होते. पार्थ पवार आणि तटकरे-पटेल यांच्या प्रचंड अंतर्गत धुसफूस असल्याच्याही चर्चा रंगल्या होत्या. त्यामुळे राष्ट्रवादी काँग्रेसमधील तटकरे आणि पटेलांचे स्थान डळमळीत झाल्याची भीती व्यक्त करत अनेकांनी त्यांच्या भावी राजकीय कारकीर्दीबाबत शंका उपस्थित केल्या होत्या. मात्र, त्याच सुनील तटकरे आणि प्रफुल पटेल यांनी अवघ्या महिनाभरातच अनुक्रमे अनिकेत तटकरे आणि राजेंद्र जैन यांना उमेदवारी मिळवून देत राष्ट्रवादी काँग्रेसमध्ये अजूनही आपला वरचष्मा कायम असल्याचे दाखवून दिले आहे.

आणखी वाचा

छगन भुजबळांची 1 अट, दिल्लीचा आदेश आणि राजेंद्र जैन यांना राज्यसभेची उमेदवारी; राष्ट्रवादीच्या बैठकीत काय घडलं?