बीसीसीआयचा निर्णय नाही, अजित अगरकरांनी स्वतःच सोडलं मुख्य निवडकर्ता पद; मोठी बातमी समोर…

बीसीसीआयची (BCCI) नुकतीच वार्षिक बैठक पार पडली. त्यानंतर, भारतीय संघाचे मुख्य निवडकर्ता म्हणून अजित आगरकर यांचा कार्यकाळ संपणार असल्याबाबत चर्चा सुरू झाली. बीसीसीआय त्यांचा करार न वाढवण्याचा निर्णय घेऊ शकते, अशा बातम्याही समोर आल्या होत्या. मात्र, आता अशी माहिती मिळत आहे की, आगरकर यांनी स्वतःच या पदावर काम सुरू ठेवण्याची इच्छा नसल्याचे दर्शवले आहे.

बीसीसीआय लवकरच नवीन मुख्य निवडकर्ता निवडण्याची प्रक्रिया सुरू करण्याची शक्यता आहे. पीटीआयच्या (PTI) वृत्तानुसार, आगरकर यांनी बीसीसीआयच्या अधिकाऱ्यांना कळवले आहे की त्यांना मुख्य निवडकर्ता म्हणून काम पुढे चालू ठेवायचे नाही. त्यांच्या निकटवर्तीयांनीही दुजोरा दिला आहे की त्यांनी हा निर्णय बोर्डाला कळवला आहे.

निवड समितीचे अध्यक्ष अजित आगरकर अलीकडेच चर्चेत राहिले आहेत. त्यांचा कार्यकाळ 4 ऑक्टोबर रोजी संपणार आहे. काही महिन्यांपूर्वी, 2027 च्या एकदिवसीय विश्वचषकाचा विचार करून बीसीसीआय आगरकर यांचा करार आणखी एका वर्षासाठी वाढवण्याचा विचार करत असल्याचे वृत्त होते. मात्र, लॉर्ड्स येथील एकदिवसीय सामन्यानंतर रोहित शर्माला भारतीय संघातून वगळण्याच्या घटनेनंतर परिस्थिती बदलल्याचे समजते.

मिळालेल्या माहितीनुसार, बीसीसीआय लवकरच वरिष्ठ निवड समितीच्या नवीन अध्यक्षाचा शोध सुरू करणार आहे. त्याच वेळी, कनिष्ठ निवड समितीमधील पाचही जागा भरण्यासाठीही शोध सुरू आहे.

देवजित सैकिया यांनी सांगितले की, बीसीसीआयला कनिष्ठ निवड समितीसाठी मोठ्या संख्येने अर्ज प्राप्त झाले आहेत. ही प्रक्रिया पुढील दोन आठवड्यांत पूर्ण होण्याची अपेक्षा आहे.

अजित आगरकर यांची 2023 मध्ये भारतीय वरिष्ठ संघाचे मुख्य निवडकर्ता म्हणून नियुक्ती करण्यात आली होती. त्यांचा तीन वर्षांचा कार्यकाळ आता संपत आहे. त्यामुळे, आगरकर यांच्यानंतर ही महत्त्वाची जबाबदारी कोण स्वीकारणार, याबद्दल मोठी उत्सुकता आहे. प्रसारमाध्यमांतील वृत्तानुसार, या पदासाठी माजी भारतीय क्रिकेटपटू पार्थिव पटेल यांचा विचार केला जात आहे. तसेच, बीसीसीआय निवड समितीच्या सध्याच्या सदस्याला वरिष्ठ पदावर बढती देण्याचाही विचार करू शकते. नवीन मुख्य निवडकर्त्याबाबतचे चित्र आगामी दिवसांत स्पष्ट होण्याची शक्यता आहे.