येत्या काही महिन्यांत भारतीय क्रिकेट संघाचे वेळापत्रक अत्यंत व्यस्त असल्याने प्रमुख खेळाडूंच्या कामाचा ताण सांभाळणे आवश्यक झाले आहे. ज्या खेळाडूंच्या कामाच्या ताणाचे नियोजन केले जात आहे, त्यात वेगवान गोलंदाज मोहम्मद सिराजचाही समावेश आहे. तो 27 सप्टेंबरपासून सुरू होणाऱ्या वेस्ट इंडिजविरुद्धच्या तीन सामन्यांच्या एकदिवसीय (ODI) मालिकेत खेळणार आहे.
दरम्यान, हैदराबाद क्रिकेट असोसिएशनने आगामी देशांतर्गत हंगामासाठी रणजी संघाचे कर्णधारपद मोहम्मद सिराजकडे सोपवले आहे. यासंदर्भात एक महत्त्वाची माहिती समोर आली आहे. वेस्ट इंडिजविरुद्धची एकदिवसीय मालिका संपल्यानंतरच सिराज आपल्या देशांतर्गत संघाशी जोडला जाईल. त्यानंतर तो रणजी ट्राॅफीच्या पहिल्या दोन सामन्यांत हैदराबादचे नेतृत्व करेल.
हैदराबाद क्रिकेट असोसिएशनने जारी केलेल्या प्रसिद्धीपत्रकानुसार, आगामी रणजी हंगामासाठी मोहम्मद सिराजची कर्णधार म्हणून नियुक्ती करण्यात आली आहे. जर सिराज उपलब्ध नसेल किंवा खेळू शकला नाही, तर उपकर्णधार सी.व्ही. मिलिंद संघाचे नेतृत्व करेल.
संघात अनुभवी फलंदाज तन्मय अग्रवाल आणि राहुल सिंग, तसेच यष्टिरक्षक राहुल रादेश आणि साई प्रज्ञय रेड्डी यांचाही समावेश आहे. 15 सदस्यांच्या या संघात तनाय त्यागराजन, अनिकेत रेड्डी आणि अजय देव गौड यांचाही समावेश आहे.
सिराज वेस्ट इंडिजविरुद्धच्या तीन सामन्यांच्या एकदिवसीय मालिकेसाठी भारतीय संघाचा भाग आहे. ही मालिका 3 ऑक्टोबर रोजी न्यू चंदीगड येथे संपणार आहे. हैदराबादचा रणजी ट्राॅफीतील पहिला सामना 11 ऑक्टोबर रोजी त्रिपुरा विरुद्ध होणार आहे. या सामन्याचे ठिकाण अद्याप निश्चित झालेले नाही. त्यानंतर, हैदराबादचा दुसरा रणजी सामना 18 ऑक्टोबरपासून विजयनगरम येथे आंध्र विरुद्ध खेळला जाईल.
वेस्ट इंडिज मालिकेपाठोपाठ भारतीय संघ न्यूझीलंडच्या दौऱ्यावर जाणार आहे, जिथे ते 22 ऑक्टोबरपासून सुरू होणारी पाच सामन्यांची टी-20 मालिका खेळतील.
सिराजचा टी-20 संघात समावेश होण्याची शक्यता कमी आहे. मात्र, तो एकदिवसीय आणि कसोटी मालिकेचा भाग असण्याची शक्यता असल्याने, तयारीसाठी त्याला लवकरच न्यूझीलंडला जावे लागू शकते. परिणामी, रणजीच्या सुरुवातीच्या टप्प्यात सिराजला केवळ दोन सामने खेळण्याची संधी मिळेल.
पहिल्या दोन रणजी सामन्यांसाठी हैदराबादचा संघ:
मोहम्मद सिराज (कर्णधार), सी.व्ही. मिलिंद (उप-कर्णधार), तन्मय अग्रवाल, एम. अभिरथ रेड्डी, राहुल सिंग, के. हिमा तेजा, राहुल रादेश (यष्टीरक्षक), साई प्रग्नय रेड्डी (यष्टीरक्षक), वरुण गौड, तनय त्यागराजन, अनिकेत रेड्डी, सीएलटी रक्षण रेड्डी, अजय देव गौड, रुतिक यादव मेंढे, साई विकास रेड्डी
Comments are closed.