RCB vs KKR: आरसीबीविरुद्धच्या सामन्यापूर्वी केकेआरला मोठा धक्का! 'मॅच विनर' खेळाडूच्या दुखापतीने वाढवली चिंता

सुरुवातीच्या पराभवानंतर कोलकाता नाईट रायडर्सच्या (Kolkata knight riders) संघाने जबरदस्त पुनरागमन केले आहे. यामुळे आता प्लेऑफच्या शर्यतीत त्यांचा दावा अधिक मजबूत झाला आहे. केकेआरचा पुढचा सामना रायपूरमध्ये रॉयल चॅलेंजर्स बंगळुरूविरुद्ध (RCB) होणार असून, स्पर्धेतील आपले स्थान टिकवण्यासाठी हा सामना जिंकणे कोलकात्यासाठी अत्यंत महत्त्वाचे आहे. मात्र, या महत्त्वाच्या सामन्यापूर्वीच केकेआरच्या गोटात चिंतेचे वातावरण आहे, कारण त्यांचा एक ‘मॅच विनर’ खेळाडू दुखापतग्रस्त झाला आहे.

कोलकाता नाईट रायडर्सचा स्टार गोलंदाज वरूण चक्रवर्ती (Varun Chakrawarthy) सध्या पूर्णपणे फिट नाही. तो आरसीबीविरुद्ध खेळणार की नाही, याचा निर्णय सामन्याच्या दिवशी सकाळी घेतला जाईल. याबद्दल माहिती देताना प्रशिक्षक शेन वॉटसन म्हणाले, “मागच्या दोन सामन्यांपासून वरुणला खूप वेदना होत होत्या, तरीही त्याने आश्चर्यकारक गोलंदाजी केली. उद्याच्या सामन्यासाठी तो उपलब्ध असेल अशी आम्हाला आशा आहे, पण आम्ही अजून खात्री देऊ शकत नाही. जर वरुण चक्रवर्ती खेळला नाही, तर केकेआरची गोलंदाजी कमकुवत होऊ शकते.

स्पर्धेच्या पहिल्या भागात केकेआरची कामगिरी अतिशय निराशाजनक होती, ज्यामुळे संघावर टीका होत होती. मात्र, आता खेळाडू फॉर्मात आले आहेत. फिन ॲलन, सुनील नरेन, रोवमॅन पॉवेल आणि कॅमरन ग्रीन सध्या चांगली कामगिरी करत आहेत. तसेच भारतीय खेळाडूही लयीत परतल्याने केकेआरचा संघ अधिक मजबूत दिसत आहे. यामुळे आगामी सामन्यात आरसीबीच्या संघावर मोठा दबाव निर्माण होऊ शकतो.