लष्करप्रमुखांचा रशिया दौरा यशस्वी

संरक्ष सहकार्य मजबुतीसाठी लष्करी पातळीवर चर्चा

वृत्तसंस्था/ नवी दिल्ली

भारतीय लष्करप्रमुख जनरल धीरज सेठ रशियाचा दौरा यशस्वी करून मायदेशी परतले आहेत. या दौऱ्यात त्यांनी भारत आणि रशिया यांच्यातील संरक्षण सहकार्य अधिक मजबूत करण्यासाठी सर्वोच्च लष्करी स्तरावर चर्चा केली. लष्करप्रमुख जनरल धीरज सेठ यांनी रशियन लष्कर मुख्यालयाला भेट देत दोन्ही देशांच्या सैन्यांमधील परस्पर हिताच्या मुद्यांवर चर्चा केली.

लष्करप्रमुख जनरल धीरज सेठ यांनी आपल्या रशिया दौऱ्याची सुरुवात मॉस्को येथून केली. सुरुवातीला त्यांना औपचारिक मानवंदना देण्यात आली. त्यानंतर त्यांनी स्मारकावर हुतात्मा जवानांना आदरांजली वाहिली. वरिष्ठ रशियन लष्करी अधिकाऱ्यांसोबतच्या चर्चेचा मुख्य भर लष्करी सहकार्य अधिक दृढ करणे, लष्करी प्रशिक्षण उपक्रमांचा विस्तार करणे आणि दोन्ही सैन्यांची क्षमता मजबूत करण्यावर होता. या चर्चेपूर्वी, जनरल धीरज सेठ यांनी मॉस्कोमध्ये औपचारिक मानवंदना पथकाची पाहणी केली.

लष्करी तोफखाना अकादमीला भेट

सेंट पीटर्सबर्ग येथील मिखाइलोव्स्काया लष्करी तोफखाना अकादमीला भेट देणे आणि तेथील लष्करी अधिकाऱ्यांशी चर्चा करणे हा देखील त्यांच्या दौऱ्याचा एक भाग होता. भारत आणि रशिया यांच्यातील दीर्घकालीन लष्करी संबंधांमध्ये अशा उच्चस्तरीय लष्करी संवादांना महत्त्वपूर्ण स्थान आहे. हा दौरा दोन्ही देशांमधील निरंतर लष्करी मुत्सद्देगिरी आणि लष्करी सहकार्याचे महत्त्व दर्शवतो.

लष्करी संबंधांवर चर्चा

या दौऱ्यादरम्यान, दोन्ही देशांमधील लष्करी संबंध आणि व्यावसायिक लष्करी सहकार्य पुढे नेण्याच्या विविध पैलूंवर चर्चा झाली. लष्करप्रमुखांनी रशियन लष्कराचे सरसेनापती कर्नल जनरल आंद्रेई निकोलायेविच मोर्दविच यांच्याशी महत्त्वपूर्ण चर्चा केली. या चर्चेत व्यावसायिक लष्करी सहकार्य आणि प्रशिक्षणाशी संबंधित मुद्यांवर प्रामुख्याने भर देण्यात आला.

मॉस्कोमधील राष्ट्रीय संरक्षण नियंत्रण केंद्राला भेट

आपल्या रशिया दौऱ्यादरम्यान, जनरल धीरज सेठ यांनी मॉस्कोमधील राष्ट्रीय संरक्षण नियंत्रण केंद्रालाही भेट दिली. त्यांनी रशियन संरक्षण मंत्रालयाच्या वरिष्ठ अधिकाऱ्यांची भेट घेऊन त्यांच्याशीही स्वतंत्रपणे संवाद साधला. भारत आणि रशिया यांचे दीर्घकाळापासूनचे संरक्षण संबंध आहेत. दोन्ही सैन्यांमधील नियमित संपर्क, प्रशिक्षण आणि लष्करी सहकार्य हे या संबंधांचा एक महत्त्वाचा भाग राहिले आहे. जनरल धीरज सेठ यांचा सध्याचा दौरा हे या लष्करी राजनैतिक संबंधांना पुढे नेण्याच्या दिशेने एक महत्त्वाचे पाऊल आहे.