राष्ट्रीय वैद्यकीय आयोगाचा प्रस्ताव : परवाना 5 वर्षांसाठी वैध
वृत्तसंस्था/ नवी दिल्ली
राष्ट्रीय वैद्यकीय आयोगाने केंद्रीय स्तरावर प्रत्येक नोंदणीकृत डॉक्टरला एक विशिष्ट ओळख क्रमांक देण्याचा प्रस्ताव ठेवला आहे. एकदा राज्य वैद्यकीय नोंदणीमध्ये नोंदणी झाल्यावर डॉक्टरला दुसऱ्या राज्यात वैद्यकीय सेवा करण्यासाठी नवीन नोंदणी किंवा परवाना घेण्याची गरज भासणार नाही. या प्रस्तावानुसार, डॉक्टरांची एक राष्ट्रीय डिजिटल नोंद तयार झाल्यामुळे नोंदणी, परवान्याची स्थिती आणि डॉक्टरांवर केलेल्या कोणत्याही शिस्तभंगाच्या कारवाईची माहितीही उपलब्ध होईल. ही नोंद ऑनलाईन उपलब्ध असेल आणि रुग्ण व रुग्णालयांना ती पाहता येईल.
हा प्रस्ताव डॉक्टर नोंदणी आणि प्रॅक्टिस परवान्यांसाठीच्या 2026 च्या मसुदा नियमांमध्ये समाविष्ट आहे. राज्य वैद्यकीय परिषदेकडून नोंदणी मिळाल्यानंतर, एनएमसीचे नीतिमत्ता आणि वैद्यकीय नोंदणी मंडळ डॉक्टरांना एक यूआयडी जारी करेल. यूआयडी मिळाल्यानंतर डॉक्टरांचे नाव राष्ट्रीय वैद्यकीय नोंदणीमध्ये नोंदवले जाईल. हा यूआयडी देशभरात डॉक्टरांची ओळख म्हणून काम करेल, ज्यामुळे त्यांना कोणत्याही राज्यात किंवा केंद्रशासित प्रदेशात प्रॅक्टिस करण्याची परवानगी मिळेल. प्रस्तावानुसार, डॉक्टरांचा परवाना पाच वर्षांसाठी वैध असेल. परवाना संपण्याच्या तारखेच्या तीन महिन्यांच्या आत त्याचे नूतनीकरण न केल्यास, डॉक्टरांची नोंदणी निक्रिय होईल. यानंतर, डॉक्टर प्रॅक्टिस करू शकणार नाहीत आणि ही माहिती एनएमआरमध्ये अद्ययावत केली जाईल.
Comments are closed.