शेतकऱ्यांना आज 'पीएम-किसान' हप्ता मिळणार आहे.

पंतप्रधान मोदी बंगालमधून खात्यांमध्ये निधी हस्तांतरित करणार

वृत्तसंस्था/ नवी दिल्ली

पंतप्रधान नरेंद्र मोदी शनिवार, 20 जून रोजी पश्चिम बंगालमधील हुगळी दौऱ्यादरम्यान पीएम-किसान योजनेचा 23 वा हप्ता वितरित करतील. या योजनेअंतर्गत, देशभरातील 9.44 कोटीहून अधिक शेतकऱ्यांच्या खात्यांमध्ये थेट 18 हजार 880 कोटी रुपये हस्तांतरित केले जातील. याचदरम्यान, पंतप्रधान मोदी पश्चिम बंगालमध्ये पुनर्रचित हवामान आधारित पीक विमा योजना देखील सुरू करतील. या योजनेसाठी एकूण अंदाजे 12,200 कोटी रुपये खर्च येईल. 2026-27 पर्यंत सुमारे 1.10 कोटी शेतकऱ्यांना 30 लाख हेक्टर जमिनीवर पीक विमा संरक्षण देण्याचे सरकारचे उद्दिष्ट आहे. यामध्ये अंदाजे 28,140 कोटी रुपयांच्या पिकांचा समावेश असेल. पीक विमा योजनांसोबतच डिजिटल शेती, नैसर्गिक शेती, धन-धान्य कृषी योजना आणि ग्रामीण रस्ते प्रकल्पांसह अनेक प्रमुख योजनांनाही पंतप्रधानांच्या उपस्थितीत हिरवा कंदील दाखविला जाणार आहे.

पंतप्रधान ओडिशाचाही दौरा करणार

पंतप्रधान नरेंद्र मोदी शनिवारी सुरुवातीला ओडिशा दौऱ्यावर जातील. त्यानंतर सायंकाळच्या सत्रात ते पश्चिम बंगालमध्ये जाणार आहेत. ओडिशामध्ये पंतप्रधान 47,600 कोटी रुपयांच्या विकास प्रकल्पांचे अनावरण करतील. या दौऱ्यात भारताच्या राष्ट्रपती श्रीमती द्रौपदी मुर्मू पंतप्रधानांसोबत असतील. या विशेष प्रसंगी राष्ट्रपती द्रौपदी मुर्मू या कार्यक्रमाला उपस्थित राहतील. यावेळी पंतप्रधान अनेक विकास प्रकल्पांची पायाभरणी करून त्यांचे उद्घाटन करतील.

राष्ट्रपती आणि पंतप्रधान सकाळी अंदाजे 11:15 वाजता मयूरभंज जिह्यातील पहारपूर गावाला भेट देतील. ते संथाली जहेरा आणि हो जहेरा येथील पवित्र वनराई, कौशल्य केंद्र आणि पहारपूर शाळेत प्रार्थना करतील. आदिवासी आणि

ग्रामीण लोकांमध्ये शैक्षणिक संधी, कौशल्य विकास आणि सामाजिक-आर्थिक सक्षमीकरण मजबूत करण्याच्या दृष्टीने ही भेट महत्त्वपूर्ण मानली जाते. दुपारी सुमारे 1 वाजता, राष्ट्रपती आणि पंतप्रधान मयूरभंज जिह्यातील रायरांगपूर येथे ओडिशा सरकारच्या दोन वर्षांच्या पूर्ततेनिमित्त आयोजित कार्यक्रमात सहभागी होतील. ‘विकास धारा, ओडिशा सारा’ या संकल्पनेवर आधारित या कार्यक्रमादरम्यान 47,600 कोटी रुपयांपेक्षा जास्त किमतीच्या विविध विकास प्रकल्पांचे उद्घाटन आणि पायाभरणी केली जाईल. याप्रसंगी पंतप्रधान उपस्थितांना संबोधितही करतील.