यंदाच्या फिफा विश्वचषकाच्या बाद फेरीमध्ये प्रथम पोहोचण्याचा मान हा मेक्सिकोने पटकावला आहे. चुरशीच्या साखळी सामन्यात दक्षिण कोरियाला 1-0 अशा फरकाने पराभूत करून मेक्सिकोने बाद फेरीतील आपले स्थान निश्चित केले.
निर्णायक गोल कसा झाला…
सामना गोलशून्य बरोबरीत असताना 58 व्या मिनिटाला दक्षिण कोरियाचा गोलरक्षक किम सेउंग-ग्यू आणि बचावपटू ली गी-ह्युक यांच्यात झालेल्या धडकेमुळे पेनल्टी एरियामध्ये चेंडू मोकळ्या ठिकाणी पडला. त्यावेळी मेक्सिकोचा रोमोला तिथे होता आणि गोल करण्याची एक सुवर्णसंधी त्याला मिळाली. या संधीचा फायदा उचलत त्याने सहजपणे गोल केला आणि तो गोल नंतर निर्णायक ठरला.
मेक्सिकोचे मोठे यश
मेक्सिकोसाठी हे मोठे यश समजले जात आहे. त्यांना 2022 मध्ये साखळी फेरीत विजय मिळवण्यात अपयश आले होते. आता उत्साही घरच्या प्रेक्षकांसमोर दोन सामने जिंकत ते बाद फेरीत पोहोचले आहेत. चाहत्यांसाठी खेळाडूंनी मैदानावर जल्लोष केला.
चुकांचा फायदा घेत जिंकलो…
मेक्सिकोच्या विजयामुळे प्रशिक्षक हावियर आगिरे आनंदित आहेत. ते म्हणाले, ‘आम्ही खूप चांगला खेळ करत आहोत. मला वाटते की दक्षिण कोरियाने आम्हाला फारशा संधी दिल्या नाहीत. पण असे असले तरी आम्ही त्यांच्या चुकांचा फायदा घेऊ शकलो.’
कोरियाकडे आली होती गोलची संधी, पण…
सामन्याच्या 87 व्या मिनिटाला दक्षिण कोरियाने बरोबरी साधण्याचा प्रयत्न केला होता. पण मेक्सिकन गोलरक्षक राऊल रँगेलने उत्कृष्ट बचाव करून धोका टाळला. मेक्सिकोच्या गोलरक्षकाने प्रथम चो ग्यू-संगचा जवळून मारलेला हेडर अडवला आणि त्यानंतर रिबाऊंडवर यांग ह्यून-जूनने मारलेला प्रयत्न त्यापेक्षाही उत्तमपणे रोखला.
मेक्सिको ठरली अव्वल…
मेक्सिकोने दोन सामन्यांतून सहा गुण मिळवून ‘अ’ गटात आपले अव्वल स्थान निश्चित केले आहे. आता ते दक्षिण कोरियापेक्षा तीन गुणांनी आणि चेकिया व दक्षिण आफ्रिकेपेक्षा पाच गुणांनी पुढे आहेत. यापूर्वी अटलांटामध्ये चेकिया आणि दक्षिण आफ्रिका यांच्यातील सामना 1-1 असा बरोबरीत सुटला होता. प्रत्येक गटातील अव्वल दोन संघ आणि तिसऱया स्थानावरील सर्वोत्तम आठ संघ नॉकआऊट फेरीसाठी पात्र ठरतील.
Comments are closed.