फिन ऍलनने पाडला षटकारांचा पाऊस, 8 वर्षांनंतर मॅक्युलम-रसेलच्या प्रसिद्ध क्लबमध्ये खेळाडूची एन्ट्री

आयपीएल 2026 च्या 51 व्या सामन्यात फिन ऍलनची बॅट जोरात बोलली. दिल्ली कॅपिटल्सविरुद्ध खेळलेल्या त्याच्या स्फोटक खेळीमुळे कोलकाता नाईट रायडर्सने केवळ नेत्रदीपक विजयच मिळवला नाही तर संघाच्या इतिहासातील सर्वात धोकादायक फलंदाजांच्या विशेष यादीत त्याचा समावेश केला. फिन ऍलनने इतकी तुफानी फलंदाजी केली की अरुण जेटली स्टेडियममध्ये बसलेले प्रेक्षकही थक्क झाले. आयपीएल 2026 मध्ये 8 मे रोजी दिल्ली कॅपिटल्स आणि कोलकाता नाईट रायडर्स आमनेसामने आले. प्रथम फलंदाजी करताना दिल्लीने 142 धावा केल्या, जे या मोठ्या सामन्यात अजिबात आव्हानात्मक नव्हते.

लक्ष्याचा पाठलाग करण्यासाठी उतरलेल्या कोलकाता नाईट रायडर्सला सुरूवातीला धक्क्याचा सामना करावा लागला, मात्र त्यानंतर फिन ऍलनने एकहाती खेळ करत सामन्याचा मार्ग बदलला. सलामी देताना ऍलनने अवघ्या 47 चेंडूत नाबाद 100 धावा केल्या आणि संघाला दणदणीत विजय मिळवून दिला. या डावात चौकारांपेक्षा षटकारांचीच अधिक चर्चा झाली. फिन ऍलनने आपल्या शतकी खेळीत एकूण 10 षटकार ठोकले. यासह, तो आयपीएलच्या एका डावात कोलकाता नाइट रायडर्ससाठी सर्वाधिक षटकार ठोकणाऱ्या फलंदाजांच्या विशेष क्लबमध्ये सामील झाला आहे.

या विशेष यादीत पहिले नाव ब्रेंडन मॅक्क्युलमचे आहे, ज्याने 2008 मध्ये आरसीबी विरुद्ध 13 षटकार ठोकले होते. दुसऱ्या स्थानावर आंद्रे रसेल आहे, ज्याने 2018 मध्ये चेन्नई सुपर किंग्ज विरुद्ध 11 षटकार ठोकले होते. आता फिन ऍलन 10 षटकारांसह तिसऱ्या स्थानावर पोहोचला आहे. फिन ऍलनची ही स्फोटक खेळी केवळ शतकी खेळी नव्हती, तर केकेआरच्या प्लेऑफच्या आशा जिवंत ठेवणारी ऐतिहासिक खेळी ठरली.

आयपीएल च्या एका डावात सर्वाधिक षटकार मारणारा केकेआर फलंदाज

13 – ब्रेंडन मॅक्युलम, 2008
11 – आंद्रे रसेल, 2018
10 – फिन ऍलन, 2026

कोलकाता नाईट रायडर्स संघ आता आपला पुढचा सामना गतविजेत्या रॉयल चॅलेंजर्स बंगळुरूविरुद्ध 13 मे रोजी खेळणार आहे. या सामन्यात 3 वेळचा चॅम्पियन संघ आरसीबीला हरवून पॉइंट टेबलमध्ये मोठी झेप घेण्याचा प्रयत्न करेल. संघाच्या खात्यात सध्या 10 सामन्यांत 9 गुण आहेत.