MI vs CSK: मुंबई इंडियन्सने लाज घालवली, एमआयचा सर्वात मोठा पराभव, सीएसकेकडून 103 धावांनी धुव्वा…

आयपीएलच्या 19व्या हंगामातील 33वा सामना मुंबई इंडियन्स आणि चेन्नई सुपर किंग्ज यांच्यात वानखेडे स्टेडियमवर पार पडला. या सामन्यात चेन्नई सुपर किंग्जने अत्यंत वर्चस्वपूर्ण कामगिरी करत, मुंबई इंडियन्सवर 103 धावांच्या मोठ्या फरकाने दणदणीत विजय मिळवला. हा पराभव मुंबई इंडियन्सच्या आयपीएल इतिहासातील सर्वात मोठा पराभव ठरला.

सामन्याची सुरुवात मुंबई इंडियन्सचा कर्णधार हार्दिक पांड्याने नाणेफेक जिंकून प्रथम गोलंदाजी करण्याचा निर्णय घेतल्याने झाली. प्रथम फलंदाजी करताना, चेन्नई सुपर किंग्जने 20 षटकांत 207 धावांची भक्कम धावसंख्या उभारली. चेन्नईकडून संजू सॅमसनने अप्रतिम खेळी साकारली. त्याने अवघ्या 54 चेंडूंत 10 चौकार आणि 6 षटकारांच्या मदतीने 101 धावांची नाबाद शतकी खेळी केली. त्याला ऋतुराज गायकवाड (22 धावा) आणि डेवाल्ड ब्रेव्हिस (21 धावा) यांनी मोलाची साथ दिली.

मुंबईच्या गोलंदाजी विभागात, गझनफर आणि अश्विन कुमार यांनी प्रत्येकी दोन विकेट घेतले, तर जसप्रीत बुमराह आणि मिचेल सँटनर यांनी प्रत्येकी एक बळी मिळवला.

208 धावांच्या लक्ष्याचा पाठलाग करताना, मुंबई इंडियन्सची सुरुवात अत्यंत निराशाजनक झाली. धावफलकावर केवळ 11 धावा असतानाच त्यांनी तीन महत्त्वाचे विकेट गमावले. त्यानंतर, तिलक वर्मा आणि सूर्यकुमार यादव यांनी डावाला सावरण्याचा प्रयत्न केला आणि चौथ्या गड्यासाठी 73 धावांची भागीदारी रचली. मात्र, तिलक वर्मा 37 धावांवर बाद झाल्यानंतर, मुंबईचा डाव पुन्हा एकदा कोलमडला. त्यानंतर काही वेळातच सूर्यकुमार यादवही 36 धावा काढून बाद झाला.

त्यानंतर मुंबईचे फलंदाज झटपट बाद होत गेले आणि संपूर्ण संघ 19 षटकांत अवघ्या 104 धावांवर गारद झाला. चेन्नईकडून अकील हुसेन हा सर्वात यशस्वी गोलंदाज ठरला त्याने सर्वाधिक चार विकेट घेतले. याव्यतिरिक्त, नूर अहमदने दोन विकेट घेतले, तर मुकेश चौधरी, अंशुल कंबोज, जेमी ओव्हरटन आणि गुरजपनीत सिंग यांनी प्रत्येकी एक बळी घेत विजयात महत्त्वपूर्ण योगदान दिले.