कोलकाता नाईट रायडर्सचा दिग्गज अष्टपैलू खेळाडू सुनील नरेनने आयपीएल (IPL) २०२६ च्या ४५ व्या सामन्यात इतिहास रचला आहे. सनरायझर्स हैदराबादविरुद्धच्या सामन्यात नरेनने शानदार गोलंदाजी करत आपल्या ४ षटकांच्या स्पेलमध्ये ३१ धावा देऊन २ बळी घेतले. या सामन्यात एक गडी बाद करताच त्याने आयपीएलमधील आपले २०० बळी (विकेट्स) पूर्ण केले आणि एक मोठी कामगिरी आपल्या नावावर केली.
सुनील नरेन आयपीएल इतिहासात २०० बळी घेणारा पहिला परदेशी (विदेशी) गोलंदाज ठरला आहे. सनरायझर्स हैदराबादचा युवा फलंदाज सलिल अरोरा याला बाद करून त्याने हा टप्पा गाठला. ३७ वर्षीय नरेन २०१२ पासून आयपीएल खेळत असून त्याने आपल्या १९७ व्या सामन्यात २०० बळींचा टप्पा पूर्ण केला.
आयपीएल इतिहासात २०० बळी घेणारा नरेन हा केवळ तिसरा गोलंदाज आहे. त्याच्यापूर्वी आयपीएलमध्ये आतापर्यंत फक्त दोनच गोलंदाजांना २०० पेक्षा जास्त बळी घेता आले आहेत. भुवनेश्वर कुमारने १९९ सामन्यांत २१५ बळी घेतले आहेत, तर युझवेंद्र चहल या यादीत अव्वल स्थानी असून त्याने १८२ सामन्यांत २२८ बळी मिळवले आहेत.
यासोबतच, सुनील नरेन आयपीएलमध्ये एकाच फ्रँचायझीसाठी (KKR) २०० बळी पूर्ण करणारा पहिला गोलंदाज बनला आहे. २०१२ मध्ये आपल्या पहिल्या आयपीएल हंगामापासूनच तो कोलकाता नाईट रायडर्सशी जोडलेला आहे. याशिवाय, नरेन कोलकाता नाईट रायडर्ससाठी सर्वाधिक बळी घेणारा गोलंदाजही ठरला आहे. या यादीत दुसऱ्या स्थानावर आंद्रे रसेल आहे, ज्याने संघासाठी १२२ बळी घेतले आहेत.
नरेनने आपल्या फिरकीच्या जाळ्यात अनेक दिग्गज फलंदाजांना अडकवले आहे. त्याच्या नावावर आता आयपीएलमधील १९७ सामन्यांत २०१ बळींची नोंद आहे. या प्रवासात त्याने ७ वेळा एका डावात ४ बळी घेण्याची किमया साधली आहे, तर एकदा ५ बळी (फाईव्ह विकेट हॉल) घेण्याचा पराक्रम केला आहे. १९ धावांत ५ बळी हे त्याचे आयपीएलमधील सर्वोत्तम प्रदर्शन आहे.
केवळ गोलंदाजीच नाही, तर सुनील नरेनने फलंदाजीतही उत्कृष्ट कामगिरी केली आहे. त्याने आयपीएलमध्ये आतापर्यंत १६५.३० च्या स्ट्राईक रेटने १८२० धावा केल्या आहेत. त्याच्या नावावर एक शतक आणि ७ अर्धशतकेही आहेत. याचसोबत नरेन आयपीएल इतिहासात १००० हून अधिक धावा आणि २०० बळींचा ‘डबल’ पूर्ण करणारा पहिला अष्टपैलू (All-rounder) खेळाडू बनला आहे.
Comments are closed.