अनेकांनी तिकीट देतो म्हणून सांगितलं नंतर नजर फिरवायचे, शिंदे साहेबांनी तिकीट दिलं : निलेश राणे

सिंधुदुर्ग : जिल्ह्यातील मालवण नगरपरिषदेच्या निवडणुकीच्या प्रचारासाठी शिवसेनेच एकनाथ शिंदेंच्या उपस्थितीत सभा सुरु आहे. शिवसेना आमदार निलेश राणे यांनी या सभेत नगराध्यक्षपदाच्या उमेदवार ममता वराडकर यांच्या प्रचारार्थ भाषण केलं.  यावेळी शिवसेनेवर ज्यांनी वार करण्याचा प्रयत्न केला त्यांच्यावर एक नाही दोन वार केले. मात्र, पक्षावर वार होऊ दिला नाही, असं निलेश राणे म्हणले. एकनाथ शिंदे यांनी तिकीट दिलं, इतरांनी शब्द दिला पण नंतर ते नजर फिरवू लागले, असं निलेश राणे म्हणाले.

मागच्या 10 वर्षात कुडाळ मालवण मतदारसंघाला काय मिळालेलं नाही. मालवण शहराचा चेहरामोहरा एकनाथ शिंदे बदलू शकतात. नगरविकास खात्याच्या माध्यमातून जेवढी काम करता येतील, साहेब सहकार्य करतील, उदय सामंत बसतील ते देखील आपल्याला सहकार्य करतील, असं निलेश राणे म्हणाले.

सर्वात जास्त नगरोत्थानचा निधी पंढरपूरला मिळतो. 10-10  कोटी रुपये निधी नगरोत्थान अंतर्गत द्यावेत. वर्षभर पर्यटक येत असतात. मालवणची किनारपट्टी पाहण्यासाठी परराज्यातून लोक येत असतात. शहर चांगलं करण्यासाठी व्हिजन डॉक्युमेंट करत आहोत. मालवणचा मोठा बॅकलॉग तुम्ही भरुन काढू शकता. शिंदे साहेंबांकडे मागणी केली की सकारात्मक होऊन येते, असं निलेश राणे म्हणाले.

आम्ही जे उमेदवार दिलेत ते निष्कलंक आहेत.  निष्कलंक उमेदवार उतरवले तरी टीका माझ्यावर होते. शिंदे साहेब आलेत नको त्या माणसांची नावं या ठिकाणी घेणार नाही, असं निलेश राणे म्हणाले.

3 डिसेंबरला शिवसेना जिंकणार : निलेश राणे

साहेब किती जरी शिवसेनेवर टीका झाली, माझ्याबद्दल काही बोललं गेलं तरी 3 तारखेला समोरच्यांचे टांगे पलटी होणार आणि शिवसेनाचं जिंकणार हा शब्द देतो, असं निलेश राणेंनी म्हटलं. शिवसेनेत आल्यानंतर माझी तब्येत चांगली झाली, असंही निलेश राणेंनी म्हटलं.

एकनाथ शिंदे यांनी मला संधी दिली, गेली 10 वर्ष कुठेतरी फेकला गेलो होतो, कोणी किंमत देत नव्हतं. 10 वर्षानंतर संधी एकनाथ शिंदे यांनी दिली. या शहरात निलेश मी तुलाच तिकीट देणार हे सांगणारा एकमेव माणूस म्हणजे एकनाथ शिंदे आहेत. अनेक लोकांनी सांगितलं तुला तिकीट देतो आणि नजर चुकवायला लागले. निलेश मुंबई बाहेर असं सांगायचे, नरिमन पॉईंटला टर्न मारला तर समोरच भेटले, असे खोटे बोलणारे भरपूर आहेत. निलेश तुला तिकीट देणार हे सांगणारे एकनाथ शिंदे आहेत, असं निलेश राणे म्हणाले.

एकनाथ शिंदे यांना जसं अपेक्षित आहे, तसाच मतदारसंघ बांधणार आहे. मला काही मंत्रिपद नको, शिंदेसाहेबांना माझ्याबद्दल गर्व असला पाहिजे. मतदारसंघातील लोकांना वाटलं पाहिजे आमच्या आमदारावर डाग नाही. सर्व काही पणाला लावलं, एकही कोपरा सोडला नाही. ज्यांनी शिवसेनेवर वार करायचा प्रयत्न केला त्याच्यावर एक नाही दोन वार केले.  पण पक्षावर वार होऊ दिला नाही, असं निलेश राणेंनी म्हटलं.

आणखी वाचा