पर्यटन खात्याने शिवाजी पार्कमधील दीपोत्सवाचं श्रेय लाटलं, परस्पर मार्केटिंग, मनसेचा संताप

मनसे दिवाळी दीपोत्सव मुंबई : मनसेप्रमुख राज ठाकरे यांच्या संकल्पनेतून सुरु झालेल्या मुंबईच्या शिवाजी पार्कमधील दीपोत्सव हा अनेकांच्या आकर्षणाचा विषय झाला आहे. मनसेने शिवाजी पार्कमध्ये (Shivaji Park) केलेली आकर्षक रोषणाई आणि फटाक्यांची आतषबाजी पाहण्यासाठी दूरवरुन लोक याठिकाणी येत आहेत. डोळ्यांचे पारणे फेडणारी फटाक्यांची आतषबाजी पाहण्यासाठी शिवाजी पार्कमध्ये दररोज प्रचंड गर्दी होत आहे. गेली अनेक वर्षे मनसे (MNS) शिवाजी पार्कमध्ये ही रोषणाई करत असली तरी त्याचे श्रेय घेणारी बॅनरबाजी मात्र राज यांच्याकडून कधीही करण्यात आली नव्हती. मात्र, आता राज्य सरकारच्या पर्यटन विभागाने परस्पर मनसेच्या या दीपोत्सवाचे श्रेय लाटण्याचा प्रकार केला आहे. पर्यटन खात्याच्या ट्विटर हँडलवर एक पोस्ट शेअर करण्यात आली आहे. तुम्ही अजून छत्रपती शिवाजी महाराज पार्कमधील फटाक्यांची आकर्षक आतषबाजी पाहिली नसेल तर तुम्ही दिवाळीत मुंबईतील उत्कृष्ट जागेला मुकत आहात, असे म्हटले आहे. पर्यटन खात्याच्या या ट्विटर पोस्टवरुन मनसेने त्यांची कानउघडणी केली आहे. (MNS Deepotsav in Dadar)

Raj Thackeray MNS: मनसेच्या पोस्टमध्ये नेमकं काय म्हटलंय?

महाराष्ट्र पर्यटन विभागाने त्यांच्या एक्स हॅण्डलवरून, मुंबईतील शिवाजी पार्क मैदानावरील ‘दीपोत्सवाची’ काही क्षणचित्रं दाखवून पुढे हा अनुभव घ्यायला या असं मुंबई आणि मुंबई बाहेरील पर्यटकांना असं आवाहन केलं आहे… दिवाळी हा हिंदूंचा सगळ्यात मोठा सण आणि या सणाच्या निमित्ताने गेली 13 वर्ष दीपोत्सव हा महाराष्ट्र नवनिर्माण सेना शिवाजी पार्क मैदानावर करत आहे… हा दीपोत्सव जरी महाराष्ट्र नवनिर्माण सेना करत असली तरी तो पूर्ण अराजकीय राहील हे आम्ही पाहिलं आणि आमचा उद्देश फक्त आणि फक्त लोकांना आनंद मिळावा हाच आहे आणि राहील…

पण जेंव्हा महाराष्ट्र सरकारचा एक विभाग या दीपोत्सवाचं मार्केटिंग हे स्वतः हा विभाग करत असल्यासारखं जेंव्हा दाखवतं तेंव्हा विशेष आश्चर्य वाटलं. महाराष्ट्र नवनिर्माण सेनेला याचं अगदी छोटंसं श्रेय दिलं असतं तर निश्चित आम्हाला आनंद झाला असता आणि सरकारच्या मनाचा उमदेपणा दिसला असता… नाशिकमध्ये सुद्धा महाराष्ट्र नवनिर्माण सेनेने जे केलं ते पुढे तत्कालीन सरकारनेच केलं अशी जाहिरातबाजी झाली.. असो.. पण तुमचे नेते ते आमचे नेते, तुमचा पक्ष आमचा पक्ष अशी कार्यपद्धती सत्ताधारी पक्षाची आहे हे दिसतंच आहे. पण आता दुसऱ्यांचे चांगले कार्यक्रम सुद्धा आपलेच आहेत हे दाखवण्यापर्यंत सरकार जाईल असे वाटले नव्हते ! असो . . .

आम्ही मराठी भाषा दिनाच्या निमित्ताने एक अभिजात कार्यक्रम यावर्षी केला, दीपोत्सव तर असतोच, असे सामान्यांना आनंद देणारे अनेक उपक्रम आम्ही करत राहणार आहोतच. त्यावेळी देखील पर्यटन विभागाला ते आमचे आहेत म्हणण्याचा मोह होईल इतके ते छान करूच, फक्त त्यावेळेस त्याचं श्रेय आमच्या पक्षाला जरूर द्या म्हणजे झालं ! ! !

आणखी वाचा

मनसेचा दीपोत्सव, शिवसेना पक्षप्रमुख उद्धव ठाकरेंच्या हस्ते उद्घाटन; ठाकरे बंधूंची दिवाळीही एकत्र

आणखी वाचा