भारताला 2026 टी-20 विश्वचषक जिंकून देणाऱ्या कर्णधार सूर्यकुमार यादवची खुर्ची गेल्याची चर्चा सुरू झाली आहे. टीम इंडियाला श्रेयस अय्यरच्या रूपाने नवा टी-20 कर्णधार मिळाला असून, याची अधिकृत घोषणा काही दिवसांत होण्याची शक्यता आहे. भारताचा पुढील टी-20 दौरा आयर्लंड आणि इंग्लंडमध्ये होणार असून, अय्यरच्या नेतृत्वाखाली संघ पुढील विश्वचषकाच्या तयारीला सुरुवात करणार आहे.
दरम्यान, एक अशी बातमी समोर आली आहे ज्यामुळे क्रिकेट वर्तुळात खळबळ उडाली आहे. दैनिक जागरणच्या वृत्तानुसार, भारतीय संघाचे मुख्य प्रशिक्षक गौतम गंभीरची पहिली पसंती श्रेयस अय्यर नव्हे तर संजू सॅमसन होता. गंभीरला सॅमसनला टी-20 संघाचे कर्णधारपद द्यायचे होते, मात्र त्याची ही मागणी मान्य करण्यात आली नाही.
वृत्तानुसार, निवड समितीतील काही सदस्य संजू सॅमसनच्या नावाबाबत पूर्णपणे समाधानी नव्हते. त्यांचे मत होते की सॅमसनच्या कामगिरीत अपेक्षित सातत्य दिसून आलेले नाही आणि कर्णधारपदासारख्या महत्त्वाच्या जबाबदारीसाठी सातत्यपूर्ण प्रदर्शन आवश्यक आहे. अलीकडील टी-20 विश्वचषकातील शेवटच्या तीन सामन्यांत सॅमसनने उपयुक्त खेळी केल्या होत्या, मात्र निवडकर्त्यांचा एक गट अजूनही त्याला दीर्घकालीन कर्णधारपदाचा पर्याय मानण्यास तयार नव्हता. काही चांगल्या डावांच्या आधारे कर्णधारपदाचा निर्णय घेणे घाईचे ठरेल, असे त्यांचे मत होते.
गौतम गंभीरची पसंती संजू सॅमसन असली तरी बीसीसीआय आणि मुख्य निवडकर्ता अजित आगरकर यांची त्यावर सहमती नव्हती. अखेर बीसीसीआय, मुख्य निवडकर्ता आणि मुख्य प्रशिक्षक यांच्यातील चर्चेनंतर श्रेयस अय्यरला कर्णधार आणि तिलक वर्माला उपकर्णधार बनवण्यावर एकमत झाल्याचे सांगितले जात आहे.
श्रेयस अय्यरने भारतासाठी शेवटचा टी-20 आंतरराष्ट्रीय सामना 2023 मध्ये खेळला होता. तो ना 2024 च्या, ना 2026 च्या टी-20 विश्वचषक विजेत्या भारतीय संघाचा भाग होता. मात्र या काळात त्याची आयपीएलमधील कर्णधार म्हणून कामगिरी विशेष गाजली.
2024 मध्ये त्याने कोलकाता नाईट रायडर्सला आयपीएल विजेतेपद मिळवून दिले होते. त्यावेळी गौतम गंभीर केकेआरचा मेंटॉर होता. 2025 मध्ये त्याच्या नेतृत्वाखाली पंजाब किंग्ज अंतिम फेरीत पोहोचली होती, जिथे त्यांना रॉयल चॅलेंजर्स बंगळुरूकडून पराभव स्वीकारावा लागला. 2026 च्या आयपीएलमध्येही पंजाबची सुरुवात दमदार झाली होती. पहिल्या सात सामन्यांपैकी सहा सामने संघाने जिंकले होते, मात्र त्यानंतर सलग सहा पराभवांमुळे त्यांना प्लेऑफमध्ये स्थान मिळवता आले नाही.
श्रेयस अय्यरने आयपीएल 2026 मध्ये 14 सामन्यांत 55.33 च्या सरासरीने आणि 168.81 च्या स्ट्राइक रेटने 498 धावा केल्या. त्यामध्ये 1 शतक आणि 5 अर्धशतकांचा समावेश होता. त्याच्या या दमदार फलंदाजीमुळेच त्याला कर्णधारपदासाठी प्रबळ दावेदार मानले जात आहे. आगामी टी-20 मालिकांमध्ये तो सूर्यकुमार यादवच्या जागी चौथ्या क्रमांकावर फलंदाजी करताना दिसू शकतो.
Comments are closed.