देवेंद्र फडणवीस, तुम्ही महिलांना तुच्छ लेखता, तुमच्यात चांगदेवाचा अहंकार भरलाय; सुषमा अंधारेंची

Sushma Andhare on Devendra Fadnavis: महाराष्ट्राचे मुख्यमंत्री देवेंद्र फडणवीस (Devendra Fadnavis) यांनी सोमवारी पत्रकार परिषद घेऊन महिला आरक्षण विधेयकाच्या (Womens Reservation Bill) मुद्द्यावर विरोधकांवर जोरदार टीका केली. विरोधकांमुळेच हे विधेयक मंजूर होऊ शकलं नाही, असा आरोप त्यांनी केला. तसेच, राज्याच्या राजकारणात विरोधी पक्षातील त्यांच्या तोडीचा कोणताही नेता या विषयावर चर्चा करण्यास तयार असेल, तर आपण खुल्या चर्चेसाठी सज्ज असल्याचे आव्हानही फडणवीस यांनी दिले. आता यावरून शिवसेना ठाकरे गटाच्या उपनेत्या सुषमा अंधारे (Sushma Andhare) यांनी देवेंद्र फडणवीस यांच्यावर घणाघाती टीका केलीय.

सुषमा अंधारे म्हणाल्या की, देवेंद्र फडणवीस यांनी 2023 मध्ये ट्विट केलं होतं, त्या ट्विटचा अर्थ काय घ्यायचा? त्यात त्यांनी ऐतिहासिक क्षण असं लिहिलं होतं, असे म्हणत त्यांनी देवेंद्र फडणवीस यांचं ट्विट वाचून दाखवलं. हे काय होतं हे फडणवीस यांनी समजावून सांगावं.  जर आता तुम्ही म्हणत असाल की विरोधकांमुळे विधेयक पडलं तर या ट्विटचा अर्थ काय? असा सवाल त्यांनी उपस्थित केला.

Sushma Andhare on Devendra Fadnavis: फडणवीसांच्या ‘त्या’ ट्विटवरून निशाणा

अमित शाह यांनी देखील 2023 मध्ये महिला आरक्षण विधेयक लोकसभा आणि राज्यसभेत मंजूर झालं, असं ट्विट केलं होतं. ते ट्विट देखील सुषमा अंधारे यांनी वाचून दाखवलं. यावर सुषमा अंधारे म्हणाल्या की, फडणवीस साहेब तुमचं काय म्हणणं आहे? खरं कोण बोलत आहे आणि खोटं कोण बोलत आहे? हे लोकांना कळू द्या. देवेंद्र फडणवीस काल रेटून खोट बोलत होते. जेव्हा महिला आरक्षणाचं बिल 2023 मध्ये संसदेत मांडलं जात होतं, त्यावेळचं भाषण देखील सुषमा अंधारे यांनी पत्रकार परिषदेत ऐकवलं. बिल पास झालं, असं त्यावेळी अमित शाह यांनी सांगितलं होतं, असे सुषमा अंधारे म्हणाल्या. तसेच, पंतप्रधान नरेंद्र मोदी यांचे 2023 मधील भाषण देखील सुषमा अंधारे यांनी पत्रकार परिषदेत ऐकवलं.

Sushma Andhare on Devendra Fadnavis: महिलांसाठी मुख्यमंत्रीपदाचा राजीनामा द्यायची तुमची तयारी आहे का?

सुषमा अंधारे पुढे म्हणाल्या की, काल विधेयकाची भ्रूण हत्या झाली, असं फडणवीस म्हणाले. भ्रूण हत्या हा शब्द त्यांनी वापरला. त्यांना या शब्दाचा अर्थ कळला नसेल, त्यांना या शब्दाचं गांभीर्य नाही.  सगळ्यात आधी महिला आरक्षणाची भ्रूण हत्या 1951 मध्ये झाली. या विधेयकाला कोणी त्यावेळी विरोध केला. याला शामा प्रसाद मुखर्जी आणि मदन मोहन मालवीय यांनी विरोध केला होता. बाबासाहेब हे बिल मांडत होते, त्यावेळी या लोकांनी कडाडून विरोध केला होता. त्यानंतर 1951 मध्ये बाबासाहेबांनी राजीनामा दिला होता.  देवेंद्र फडणवीस साहेब तुमची तयारी आहे का? मुख्यमंत्रीपदाचा राजीनामा द्यायची? तेही महिलांसाठी… डॉ. बाबासाहेब आंबेडकरांनी केंद्रात राजीनामा दिला होता, असे म्हणत त्यांनी देवेंद्र फडणवीस यांच्यावर हल्लाबोल केला.

देवेंद्र फडणवीसांवर सुषमा अंधारे : देवेंद्र फडणवीस तुम्ही महिलांना कमी लेखता

तुम्ही काल खूप आव्हाने दिली. तुम्हाला माझे आव्हान आहे की, महात्मा फुले यांनी लिहिलेल्या दोन पुस्तकांचं वाचन तुम्ही RSS च्या वार्षिक कार्यक्रमात करणार का? गुलामगिरी आणि शेतकऱ्याचा आसूड, हे फडणवीस यांनी वाचून दाखवावं. किमान या पुस्तकावर मोहन भागवत यांची काय प्रतिक्रिया आहे? ते तरी विचारावं. साऊथ विरुद्ध नॉर्थ हा संघर्ष भाजप करत आहे. मुख्यमंत्री देवेंद्र फडणवीस यांनी विरोधकांना रंग बदलणारा सरडा, असं म्हटलं. मुख्यमंत्र्यांकडून ही अपेक्षा नाही. फडणवीस साहेब तुमचा स्तर नेमका कोणता आहे हे आधी मला सांगा. तुम्ही हा स्तर कसा ठरवला? देवेंद्र फडणवीस साहेब तुम्ही सुप्रिया सुळे आणि प्रणिती शिंदे यांचा अवमान केला. तुम्ही या दोघींच्या उत्तरांना नाकारता म्हणजे तुम्ही महिलांना कमी लेखतात. तुम्ही महिलांना तुच्छ समजतात. तुम्ही स्तराची भाषा केली.  देवेंद्र फडणवीस यांच्यात चांगदेवाचा अहंकार भरला आहे, अशी टीका देखील सुषमा अंधारे यांनी केली.

देवेंद्र फडणवीसांवर सुषमा अंधारे : तुम्ही चर्चेला बोला, आम्ही तयार आहोत

सुषमा अंधारे पुढे म्हणाल्या की, देवेंद्र फडणवीस साहेब, तुम्ही चर्चेला बोलवा. आम्ही तयार आहोत. जर तुम्ही चर्चा नाही केली तर तुम्ही सत्याला सामोरे जायला घाबरतात, असं होईल. वेळ, दिवस तुम्ही ठरवा,  आम्ही येऊ. तुमच्या सगळ्या प्रश्नाची उत्तरं आम्ही देऊ. मी एकटी यायला देखील तयार आहे, असा म्हणत त्यांनी देवेंद्र फडणवीसांनी दिलेलं आव्हान स्वीकारलं.

आणखी वाचा

Devendra Fadnavis on Womens Reservation Bill: महिला आरक्षण विधेयक 2029 मध्ये लागू होईल, महिलाच विरोधकांना वठणीवर आणतील, जनमताच्या रेट्याने विरोधकांचे चेहरे उघडे पाडू : देवेंद्र फडणवीस

आणखी वाचा