अमेरिकेच्या राजकारणात ट्रम्प यांना मोठा झटका! इराण युद्धावर विरोधकांचा प्रस्ताव संसदेत मंजूर; त्याच पक्षाच्या खासदारांनी पाठ फिरवली

अमेरिकेचे राष्ट्राध्यक्ष डोनाल्ड ट्रम्प यांना मोठा झटका बसला आहे. ट्रम्प यांच्या इराणवरील हल्ल्याविरोधात अमेरिकन काँग्रेसमध्ये ठराव मंजूर करण्यात आला आहे. ट्रम्प यांनी संसदेच्या परवानगीशिवाय इराणवर लष्करी कारवाई करू नये यासाठी हा प्रस्ताव आणण्यात आला होता. आश्चर्यकारक बाब म्हणजे ट्रम्प यांच्या रिपब्लिकन पक्षाच्या सदस्यांनीच यातून माघार घेतली आहे.

रिपब्लिकन पक्षात फूट?

या प्रस्तावाला यूएस काँग्रेसमध्ये 215 पैकी 208 मते मिळाली. त्यात चार रिपब्लिकन सदस्यांचा समावेश आहे. 28 फेब्रुवारी 2026 रोजी इराणवर इस्रायलसोबत मिळून हल्ला करण्यात आला. ट्रम्प यांनी या हल्ल्यासाठी संसदेची परवानगी घेतली नाही. या युद्धाला तीन महिने उलटले आहेत. दोन्ही देशांमध्ये अनेक चर्चेनंतरही कोणताही ठोस परिणाम झालेला नाही.

प्रस्तावाच्या बाजूने असलेल्या रिपब्लिकनमध्ये मिशिगनचे टॉम बॅरेट, ओहायोचे वॉरेन डेव्हिडसन, पेनसिल्व्हेनियाचे ब्रायन फिट्झपॅट्रिक आणि केंटकीचे थॉमस मॅसी यांचा समावेश आहे. संसदेच्या या सदस्यांनी युद्ध संपवण्याच्या मागणीसाठी डेमोक्रॅट्सला पाठिंबा दिला आहे. सध्या हा प्रस्ताव अंमलबजावणीसाठी सिनेटकडे पाठवण्यात आला आहे. मात्र, ट्रम्प यांनी या प्रस्तावावर आपला व्हेटो पॉवर वापरला तर या विधेयकाचे कायद्यात रुपांतर होणे अशक्य आहे.

इराण युद्धामुळे अमेरिकेला मोठा धक्का बसणार आहे
28 फेब्रुवारीपासून सुरू झालेल्या युद्धाला शनिवारी 100 दिवस पूर्ण झाले. या युद्धावर अमेरिकेने खूप पैसा खर्च केला आहे. पेंटागॉनच्या अहवालानुसार, सुमारे $29 अब्ज खर्च झाले आहेत. हे युद्ध असेच चालू राहिल्यास $1 ट्रिलियन पर्यंत खर्च होण्याची शक्यता आहे.

याशिवाय या युद्धामुळे आतापर्यंत 3,400 हून अधिक लोकांना आपला जीव गमवावा लागला आहे. यामध्ये 13 अमेरिकन सैनिकही मारले गेले आहेत. या युद्धामुळे जागतिक स्तरावरही मोठे नुकसान होत आहे. तणावामुळे होर्मुझचा महत्त्वाचा व्यापारी मार्ग बंद झाल्याने आंतरराष्ट्रीय बाजारपेठेत तेल आणि वायूचा पुरवठा विस्कळीत झाला आहे. त्यामुळे इंधनाचे दर गगनाला भिडले आहेत.

शांतता चर्चा अयशस्वी
गेल्या महिनाभरापासून दोन्ही देशांमध्ये पडद्याआड शांतता चर्चा सुरू असल्याचा दावा केला जात आहे. मात्र अद्याप कोणताही ठोस निर्णय झालेला नाही. याच कारणामुळे युएस काँग्रेसमध्ये युद्ध थांबवण्यासाठी विरोधकांचा प्रस्ताव अत्यंत महत्त्वाचा मानला जात आहे.