भारतीय क्रिकेटचा इतिहास अशा अनेक दिग्गजांनी समृद्ध आहे ज्यांनी अगदी तरुण वयातच मोठे यश संपादन केले. मात्र, बिहारमधील समस्तीपूरचा रहिवासी असलेला युवा स्टार वैभव सूर्यवंशी याची कारकीर्द अत्यंत वेगाने बहरत आहे. वयाच्या अवघ्या 15व्या वर्षी, वैभवने गेल्या दोन वर्षांत सात ऐतिहासिक विक्रम प्रस्थापित केले आहेत. ‘अंडर-19’ पासून ते आंतरराष्ट्रीय क्रिकेटपर्यंतच्या विविध प्रकारांमध्ये स्वतःची एक वेगळी ओळख निर्माण केली आहे.
वैभव सूर्यवंशीचा क्रिकेटचा प्रवास केवळ धावा करण्यापुरता मर्यादित नाही, तर मैदानात उतरल्यावर प्रत्येक वेळी इतिहास घडवण्याची ती एक गाथा आहे. गेल्या दोन वर्षांत, त्याने ‘रेड-बॉल’ आणि ‘व्हाइट-बॉल’ अशा दोन्ही प्रकारांत आपल्या आक्रमक पण संयमी फलंदाजीची छाप पाडली आहे. या प्रवासात सात महत्त्वपूर्ण विक्रम आपल्या नावावर केले आहेत.
वैभवने आपल्या विक्रमी प्रवासाची सुरुवात ‘रेड-बॉल’ क्रिकेटमधून केली. ‘अंडर-19’ कसोटी क्रिकेटमध्ये शतक झळकावताना त्याचे वय अवघे 13 वर्षे आणि 187 दिवस होते. या प्रकारात ही कामगिरी करणारा तो जगातील सर्वात तरुण फलंदाज ठरला.
एकदिवसीय (ODI) क्रिकेटमध्येही त्याची उत्कृष्ट कामगिरी कायम राहिली. वयाच्या 14 वर्षे आणि 100 दिवस असताना, ‘अंडर-19’ एकदिवसीय सामन्यात शतक ठोकून त्याने आपल्या अफाट क्षमतेची चुणूक दाखवून दिली.
टी-20 प्रकारात वैभवने क्रिकेट विश्वात खळबळ उडवून दिली. आयपीएल जी प्रमुख टी-20 लीग मानली जाते. त्यामध्ये राजस्थान रॉयल्सने या युवा प्रतिभेवर विश्वास दाखवला आणि वैभवने त्या अपेक्षा पूर्णपणे सार्थ ठरवल्या.
वयाच्या 14 वर्षे आणि 32 दिवस असताना, आयपीएलच्या इतिहासात शतक ठोकणारा सर्वात तरुण खेळाडू होण्याचा विक्रम त्याने आपल्या नावावर केला. त्याच्या आक्रमक फलंदाजीच्या शैलीने अनुभवी गोलंदाजांनाही थक्क केले. त्याच आयपीएल हंगामात त्याने 72 षटकार ठोकले आणि एका हंगामात सर्वाधिक षटकार मारण्याचा टी-20 मधील दिग्गज खेळाडू ख्रिस गेलचा विक्रम मोडीत काढला.
सय्यद मुश्ताक अली ट्रॉफीमध्येही वैभवने आपली आक्रमक फलंदाजीची शैली कायम राखली. वयाच्या 14 वर्षे आणि 250व्या दिवशी शतक झळकावून, या स्पर्धेत अशी कामगिरी करणारा तो सर्वात तरुण फलंदाज ठरला.
त्याच्या सातत्यपूर्ण आणि उत्कृष्ट कामगिरीमुळे त्याला ‘टीम इंडिया’ची जर्सी परिधान करण्याची संधी मिळाली. वयाच्या 15 वर्षे आणि 99व्या दिवशी भारतासाठी पदार्पण केल्यानंतर, त्याने १५ वर्षे आणि 118 व्या दिवशी आपले पहिले टी-20 आंतरराष्ट्रीय अर्धशतक पूर्ण केले आणि या प्रकारात हा टप्पा गाठणारा सर्वात तरुण खेळाडू बनला.
त्यानंतर अवघ्या तीन दिवसांनी वयाच्या 15 वर्षे आणि 121व्या दिवशी भारतीय पुरुष क्रिकेटच्या इतिहासात ‘प्लेअर ऑफ द मॅच’ (सामनावीर) पुरस्कार जिंकणारा सर्वात तरुण खेळाडू होण्याचा विक्रम त्याने आपल्या नावावर केला.
टी-20 आणि एकदिवसीय (ODI) सामन्यांमध्ये आपली क्षमता सिद्ध केल्यानंतर, वैभवने ‘रेड-बॉल’ क्रिकेटमध्येही आपली गुणवत्ता दाखवून दिली. यंदाच्या दुलीप ट्रॉफीमध्ये ‘ईस्ट झोन’चा उपकर्णधार म्हणून खेळताना, ‘सेंट्रल झोन’ विरुद्धच्या उपांत्य सामन्यात त्याने केवळ ८१ चेंडूंमध्ये ९२ धावांची धडाकेबाज खेळी केली.
जरी तो शतकापासून अवघ्या आठ धावांनी दूर राहिला, तरी या खेळीदरम्यान त्याने ५७ वर्षे जुना विक्रम मोडीत काढला. वयाच्या 15 वर्षे आणि 157व्या दिवशी, दुलीप ट्रॉफीमध्ये अर्धशतक झळकावणारा तो इतिहासातील सर्वात तरुण फलंदाज ठरला.
2026 हे वर्ष वैभव सूर्यवंशीसाठी एखाद्या स्वप्नवत वर्षापेक्षा कमी नव्हते. इंडिया अंडर-19, इंडिया ए, वरिष्ठ भारतीय संघ, राजस्थान रॉयल्स आणि दुलीप ट्रॉफीमधील ईस्ट झोन या संघांसाठी खेळताना त्याने प्रभावी कामगिरी केली आहे.
या वर्षी, क्रिकेटच्या सर्व प्रकारांमध्ये मिळून वैभवने 41 डावांमध्ये तब्बल 2022 धावा केल्या आहेत. या काळात त्याने 3 शतके आणि 14 अर्धशतके झळकावली आहेत.
वैभवच्या फलंदाजीची सर्वात मोठी ताकद म्हणजे त्याचे उत्कृष्ट टाइमिंग आणि चौकार व षटकार मारण्याची त्याची क्षमता. या वर्षात आतापर्यंत त्याने 179 चौकार आणि तब्बल 161 षटकार ठोकले आहेत.
Comments are closed.