बांगलादेशकडून लाजिरवाण्या पराभवानंतर पाकिस्तान क्रिकेटमध्ये भूकंप! मसूदची खुर्ची धोक्यात, बाबर

पाकिस्तान कसोटी कर्णधार अद्यतन : पाकिस्तान क्रिकेट संघाला बांगलादेश विरुद्धच्या पहिल्या कसोटीत 104 धावांनी लाजिरवाणा पराभव पत्करावा लागल्यानंतर संघात मोठी खळबळ उडाली आहे. ढाक्यात झालेल्या या पराभवानंतर आता कर्णधार शान मसूदची गादी धोक्यात आल्याची चर्चा रंगली असून पुन्हा एकदा बाबर आझमकडे कसोटी संघाची धुरा सोपवली जाऊ शकते, अशी माहिती समोर येत आहे.

पहिल्या कसोटीत दुखापतीमुळे बाबर आझम खेळू शकला नव्हता, तर शान मसूद दोन्ही डावांत अपयशी ठरला. त्यानंतर पाकिस्तान क्रिकेट बोर्डामध्ये मोठ्या हालचाली सुरू झाल्याचं सांगितलं जात आहे. वृत्तांनुसार, वर्ल्ड टेस्ट चॅम्पियनशिपच्या उर्वरित सामन्यांसाठी बाबर आझमला पुन्हा कसोटी कर्णधार बनवण्याचा गंभीर विचार सुरू आहे.

सूत्रांच्या माहितीनुसार, पीसीबीमधील काही प्रभावशाली अधिकारी बाबरला पुन्हा नेतृत्वाची संधी देण्याच्या बाजूने आहेत. डिसेंबर 2023 पासून शान मसूदच्या नेतृत्वाखाली पाकिस्तानने 15 पैकी तब्बल 11 सामने गमावले आहेत. त्यामुळे संघाच्या कामगिरीवर नाराजी व्यक्त होत असून उरलेल्या 7 कसोटी सामन्यांसाठी नव्या नेतृत्वाची गरज असल्याचं बोर्डाला वाटत आहे.

सूत्रांनी दिलेल्या माहितीनुसार, “जर बाबर दुसऱ्या कसोटीत पुनरागमन करून फलंदाजीत लय मिळवण्यात यशस्वी ठरला, तर तो पुन्हा कर्णधारपदासाठी सर्वात मजबूत दावेदार ठरू शकतो. बोर्डातील अनेकांना त्याच्या पुनरागमनावर कोणतीही हरकत नाही.”

दरम्यान, बाबर आझम याने 2019 ते 2023 या काळात तिन्ही फॉरमॅटमध्ये पाकिस्तानचं नेतृत्व केलं होतं. मात्र, भारतात झालेल्या 2023 वनडे वर्ल्ड कपनंतर त्यांना कर्णधारपद सोडावं लागलं. त्यानंतर 2024 टी20 वर्ल्ड कपसाठी त्यांना पुन्हा कर्णधार बनवण्यात आलं होतं, पण खराब कामगिरीनंतर त्यांनी पुन्हा पद सोडलं. आता बांगलादेशकडून झालेल्या पराभवानंतर पाकिस्तान क्रिकेटमध्ये मोठा भूकंप होण्याची चिन्हं दिसत असून, बाबर आझमच्या पुनरागमनाकडे संपूर्ण क्रिकेटविश्वाचं लक्ष लागलं आहे.

हे ही वाचा –

RCB vs KKR IPL 2026 : रायपूरमध्ये पावसाचा कहर; सामना रद्द झाला तर कोण जाणार प्लेऑफमध्ये? RCB-KKRचं धक्कादायक समीकरण समोर

आणखी वाचा