खळबळजनक! पिंपरी-चिंचवडमधील फुगेवाडीत एकाच दिवशी 5 जणांचा मृत्यू; नक्की कारण काय?

पुगेवाडी मृत्यू प्रकरण : पुणे–मुंबई महामार्गालगत असलेल्या पिंपरी-चिंचवडमधील फुगेवाडी भागात एकाच दिवशी तब्बल पाच जणांचा मृत्यू झाल्याची धक्कादायक घटना समोर आली आहे. या एकाच दिवशी झालेल्या पाच मृत्यूनं संपूर्ण परिसरात मोठी खळबळ उडाली असून नागरिकांमध्ये भीतीचे वातावरण पसरलं आहे. फुगेवाडी गावातील आझाद चौकातील एका शोककुळाच्या फलकावर जेव्हा या पाचही जणांच्या निधनाची माहिती एकत्रितपणे प्रसिद्ध झाली, तेव्हा हा संपूर्ण प्रकार उघडकीस आला.

Pimpri Chinchwad Illegal Liquor Den : अवैध हातभट्टीच्या दारूमुळे मृत्यू झाल्याची चर्चा

या धक्कादायक घटनेनंतर फुगेवाडी परिसरात सध्या विविध चर्चांना उधाण आलं आहे. गावातील आझाद चौक आणि परिसरात दोन ठिकाणी अवैध हातभट्टी आणि गावठी दारूचे (Handbhatti Liquor) अड्डे राजरोसपणे सुरू आहेत. त्यामुळे या पाचही नागरिकांचा मृत्यू हा याच अड्ड्यांवरील विषारी किंवा भेसळयुक्त गावठी दारू पिल्यामुळेच झाला असावा, अशी भीती आणि दबक्या आवाजातील चर्चा स्थानिक नागरिकांमध्ये मोठ्या प्रमाणावर सुरू आहे. यामुळे पोलीस प्रशासनाच्या कार्यपद्धतीवरही प्रश्नचिन्ह उपस्थित केले जात होते.

Dapodi Police Investigation : पोलिसांचा प्राथमिक तपासात मोठा खुलासा

या प्रकरणाचे गांभीर्य ओळखून दापोडी पोलिसांनी (Dapodi Police) तातडीने या प्रकरणाचा प्राथमिक तपास सुरू केला. मात्र, पोलिसांनी तपासानंतर स्थानिक नागरिकांचे सर्व दावे आणि चर्चा फेटाळून लावल्या आहेत. पोलिसांच्या प्राथमिक तपासाअंती या पाचही घटना पूर्णपणे वेगवेगळ्या आणि स्वतंत्र असल्याचं स्पष्ट करण्यात आलं आहे. पाचपैकी चार मृतांना दारूचे कोणतेही व्यसन नव्हते आणि कोणत्याही नातेवाईकाने आपल्या माणसाने हातभट्टीची दारू पिल्याची साधी तक्रारही पोलिसात केलेली नाही, असे दापोडी पोलिसांनी स्पष्ट केले आहे.

Phugewadi Dead Body Identity : मृतांची नावे आणि पोलिसांची माहिती

दापोडी पोलिसांनी दिलेल्या अधिकृत माहितीनुसार, मृत पावलेल्या पाचही नागरिकांची पार्श्वभूमी आणि मृत्यूचे प्राथमिक कारण खालीलप्रमाणे समोर आले आहे:

पांडुरंग फुगे (वय 57) : यांचा मृत्यू हा पूर्णपणे नैसर्गिक (Natural Death) कारणाने झाला आहे.

विजय राठोड (वय 31) व राजेंद्र राठोड (वय 34) : या दोन सख्ख्या भावांचा मृत्यू झाला असून, त्यांचा मृत्यू हृदयविकाराच्या तीव्र झटक्याने (Heart Attack) झाला असावा, असा प्राथमिक अंदाज डॉक्टरांनी वर्तवला आहे.

राजेंद्र राजपूत (वय 51) : हे घरात असताना अचानक बाथरूममध्ये चक्कर येऊन पडले. डोक्याला गंभीर दुखापत झाल्यानं त्यांचा जागीच मृत्यू झाला.

अकबर पठाण (वय 52) : हे गेल्या 15 वर्षांपासून तीव्र दारूच्या सवयीचे (Alcohol Addiction) होते. त्यांचा मृत्यू अतिमद्यप्राशनाने किंवा इतर आजाराने झाल्याची शक्यता आहे.

Post Mortem Report : शवविच्छेदन अहवालाची प्रतीक्षा

या संपूर्ण प्रकरणाचा पुढील सखोल तपास वरिष्ठ पोलीस अधिकाऱ्यांच्या मार्गदर्शनाखाली दापोडी पोलीस करत आहेत. एकाच दिवशी झालेल्या या पाच मृत्यूंमागे कोणताही साखळी गुन्हा किंवा विषारी दारूचा संबंध नसल्याचं पोलिसांनी सुरुवातीला म्हटलं असलं, तरीही सर्व मृतदेहांचा शवविच्छेदन अहवाल (Post Mortem Report) आल्यानंतरच मृत्यूचे नक्की आणि अचूक कारण काय होतं, हे वैद्यकीयदृष्ट्या स्पष्ट होईल.

ही बातमी वाचा:

आणखी वाचा