तुकाराम मुंढेंच्या रडारवर आता मुंबईतील व्यापारी; 1,328 किलो भेसळयुक्त मिठाई, मावा जप्त

मुंबई : अन्नातील भेसळीविरोधात (Food Adulteration) राज्यभर कारवाईचा तीव्र धडाका लावलेले अन्न व औषध प्रशासन (FDA) आयुक्त तुकाराम मुंढे (Tukaram Mundhe) यांची वक्रदृष्टी आता मुंबईतील भेसळखोर व्यापाऱ्यांवर पडली आहे. मुंबईत एफडीएच्या पथकाने एक मोठी कारवाई करत तब्बल 1,328 किलो संशयित भेसळयुक्त मिठाई आणि मावा जप्त केला आहे. या धडक कारवाईमुळे मुंबईतील अस्वच्छ आणि भेसळयुक्त अन्नपदार्थ विकणाऱ्या व्यापाऱ्यांमध्ये प्रचंड खळबळ उडाली आहे.

एफडीएच्या पथकाने मुंबईतील गिरगाव आणि कुंभारवाडा परिसरातील दोन वेगवेगळ्या ठिकाणी अचानक छापेमारी (FDA Raid) करून ही कारवाई केली. जप्त करण्यात आलेल्या एकूण मालाची बाजारपेठेतील किंमत 3 लाख 60 हजार 380 रुपये एवढी आहे.

Tukaram Mundhe FDA Action Report : मोठ्या प्रमाणात साठा जप्त

एफडीए आयुक्तांच्या थेट मार्गदर्शनाखाली झालेल्या या मोहिमेत खालील व्यापाऱ्यांवर कारवाई करण्यात आली:

डी. एम. मावावाला (DM Mavawala) या ठिकाणाहून तब्बल 1,239 किलो संशयित मिठाई आणि मावा जप्त करण्यात आला आहे.

विजयकांत यादव (Vijaykant Yadav) या व्यापाऱ्याकडून 89 किलो संशयित माव्याचा साठा जप्त करण्यात आला आहे.

छापेमारी दरम्यान या दोन्ही ठिकाणी मिठाई आणि माव्याची अत्यंत अस्वच्छ पद्धतीने साठवणूक केली असल्याचं उघड झालं. तसेच, पॅकिंगवरील लेबल नियमांचे सर्रास उल्लंघन आणि अन्नपदार्थ टिकवण्यासाठी आवश्यक असलेल्या तापमान नियंत्रणाचा (Temperature Control) पूर्णपणे अभाव आढळला.

Food Adulteration Lab Testing : आरोग्यासाठी अत्यंत धोकादायक

जप्त करण्यात आलेले अन्नपदार्थ निकृष्ट दर्जाचे आणि मानवी आरोग्यासाठी अत्यंत घातक असल्याचा संशय एफडीएने व्यक्त केला आहे. या कारवाईनंतर मिठाई आणि माव्याचे 5 अधिकृत नमुने (Samples) तातडीने पुढील रासायनिक तपासणीसाठी प्रयोगशाळेत (Laboratory Testing) पाठवण्यात आले आहेत. या प्रयोगशाळेचा अहवाल आल्यानंतर संबंधित व्यापाऱ्यांवर अन्न सुरक्षा कायद्यानुसार पुढील कडक कायदेशीर कारवाई केली जाणार आहे.

FDA Appeal : दूधजन्य पदार्थांच्या साठवणुकीबाबत एफडीएचे आवाहन

मुंबई आणि परिसरातील दूध आणि दुग्धजन्य पदार्थांच्या वाढत्या मागणीच्या पार्श्वभूमीवर, एफडीएने सर्व उत्पादक आणि व्यापाऱ्यांना कडक इशारा दिला आहे. सर्व व्यापाऱ्यांनी दुग्धजन्य पदार्थांची साठवणूक ही स्वच्छ जागी आणि योग्य तापमान नियंत्रित ठेवूनच करावी, असं आवाहन प्रशासनातर्फे करण्यात आलं आहे. नियमांचे उल्लंघन करणाऱ्यांची गय केली जाणार नाही, असे संकेत आयुक्त तुकाराम मुंढे यांच्या या नव्या कारवाईतून मिळाले आहेत.

ही बातमी वाचा: