इंग्लंड विरुद्ध श्रीलंका यांच्यात सध्या तीन सामन्यांची एकदिवसीय (ODI) मालिका सुरू आहे. मालिकेतील पहिला सामना चेस्टर-ले-स्ट्रीट येथे खेळला गेला. यजमान इंग्लंडने श्रीलंकेवर दणदणीत विजय मिळवत मालिकेत 1-0 अशी आघाडी घेतली. इंग्लंडचा संघ 265 धावांत सर्वबाद झाला असला तरी, श्रीलंकेला या लक्ष्याचा पाठलाग करताना 200 धावांचा टप्पाही गाठता आला नाही. विल जॅक्सने अष्टपैलू कामगिरी करत श्रीलंकेचा डाव गुंडाळण्यात महत्त्वाची भूमिका बजावली, त्याने 46 धावा केल्या आणि 5 बळी घेतले, ज्यामुळे त्याला ‘सामनावीर’ (Player of the Match) पुरस्काराने गौरवण्यात आले.
या सामन्यात इंग्लंडचा कर्णधार हॅरी ब्रूकने नाणेफेक जिंकून प्रथम फलंदाजी करण्याचा निर्णय घेतला. इंग्लंडची सुरुवात खराब झाली. अवघ्या 16 धावांवर त्यांनी पहिली विकेट गमावली. मात्र, दुसऱ्या विकेटसाठी झालेल्या 51 धावांच्या भागीदारीमुळे डावाला स्थैर्य मिळाले. ठराविक अंतराने विकेट्स पडत असूनही, इंग्लंडने लहान पण उपयुक्त भागीदारींच्या जोडीने आपली धावसंख्या वाढवली. अखेरीस, 49व्या षटकाच्या पहिल्याच चेंडूवर संपूर्ण संघ 265 धावांत सर्वबाद झाला.
कर्णधार हॅरी ब्रूक इंग्लंडसाठी सर्वाधिक धावा करणारा फलंदाज ठरला. त्याने 67 धावांची खेळी केली. विल जॅक्स 46 धावांवर नाबाद राहिला. जो रूट (44), बेन डकेट (32) आणि जोस बटलर (31) यांनीही महत्त्वपूर्ण योगदान दिले. श्रीलंकेकडून असिथा फर्नांडो आणि सचिंदू कोलंबगे यांनी प्रत्येकी तीन बळी घेतले.
266 धावांच्या लक्ष्याचा पाठलाग करताना श्रीलंकेची सुरुवातही खराब झाली. संघाच्या विकेट्स ठराविक अंतराने पडत गेल्या आणि अखेरीस 37व्या षटकात संपूर्ण संघ अवघ्या 176 धावांत सर्वबाद झाला.
विल जॅक्सने अवघ्या चार चेंडूंमध्ये श्रीलंकेच्या शेवटच्या तीन विकेट्स घेत इंग्लंडचा विजय निश्चित केला. श्रीलंकेसाठी दुनिथ वेलालागेने सर्वाधिक 45 धावा केल्या, तर कर्णधार कुसल मेंडिसने 42 धावांचे योगदान दिले. पथुम निसांकाने 27 धावा केल्या. मात्र, श्रीलंकेचे फलंदाज विल जॅक्स (5 बळी) आणि जेमी ओव्हरटन (2 बळी) यांच्या गोलंदाजीचा सामना करू शकले नाहीत. टी-20 मालिकेनंतर, श्रीलंकेने आता एकदिवसीय मालिकेची सुरुवातही पराभवाने केली आहे. मालिकेत अजून दोन सामने बाकी असल्याने, श्रीलंकेकडे पुनरागमन करण्याची संधी आहे.
Comments are closed.